Qeqqani kommuneqarfissami Sisimiut ukiortaaq 2009-mi illoqarfiit pingaarnersarissavaat. Borgmestereqarfik, atorfilittallu tamarmik Sisimiuniitinniarneqarput.
Sisimiut Maniitsullu kommunalbestyrelsiisa, atorfilittat, suliffeqarfiutillillu Sisimiuni sapaatip-akunnerata naanerani ataatsimiinneranni aalajangiunneqartoq, Maniitsup borgmesteria Søren Lyberth oqarpoq.
Maniitsumi atorfiit arlalissuit Sisimiunut nuunneqartussanngornerat, Siumut Maniitsup siulittaasuata Isak Davidsenip naammagivallaanngilaa, Maniitsoq nunaqarferujussuartut isigisaaleqqunnginnamiuk:
-Tassa siullermik oqaatigissavara ilaasortatta angorusutaat, uagullumi angorusutarput tassaavoq, Maniitsoq kattunnermi uani missukutaanani nunaqarferujussuartullu isigisaanani aamma Sisimiutulli assigiinnerusumik atugassaqartitsisoqassasoq – suliffiit tungaasigut aamma taamma arfininngormat borgmesterit ataatsimeeqatigineranni aamma suliffinnik ikililerisoqassanngitsoq neriusuutigineqarpoq. Pissanganarpoq, taannartaa qanoq inaalinniarneqarumaarnersoq, kisianni tassa suut tamarmik Sisimiuniittussanngorlugit politikkikkut massakkut inaaliisoqarsimagunarpoq.
Isak Davidsen neriuppoq, kommunalbestyrelset kommunet kattussuuppata Sisimiut qeqqani illoqarfiit pingaarnersarinissaanik isumaqatigiissimanerat radiokkut tusareerlugu eqqarsaannersimalluni.
-Namminersornerullutik Oqartussaningaanniit kommunit kattunneranni suliffiit nussorneqartussat, Maniitsup borgmesteriata Søren Lyberth-ip oqaatigaa. Naluara tassani suut pineqarnersut aammalu qaqugu tamakku Maniitsumut nussorneqarumaarnersut, ilumullu nussorneqassanersut, Isak Davidsen oqarpoq.
Aperaarput borgmesterit arfininngormat ataatsimeeqatigineqareersullu qanoq aalajangersimanermik tusagassiuutit aqqutigalugit tusagaqarnini qanoq isigineraa, imalu akivoq:
- Siumut immikkoortortaqarfiit marluusut ippssarli ualikkut sisamanngulersoq atsioqatigiilluta allakkanik nassiussassanngorlugit Siumut immikkoortortaqarfiat maani Sisimiuniittoq atsioqatigivarput, borgmesterinut ingerlateqqitassanngorlugu, kisianni akissutisinngilagut, tusagassiuutaannartigut tusarpagut.
Qanoq ippa?
- Uanga taama pineq nuannarivallaanngilara, pissutigalugu politikkikkut suliniaqatigiiffiugatta. Arlaatigut pisoqalertillugu tapersersugassaralutigit aamma akerlilersinnaasariaqaratsigit, siulliulluta tusarleqqaarneqarsimasariaqaraluarpugut.
Isak Davidsen umiarsuarmut ilaalluni Maniitsumut aallalersoq taama oqarpoq.
Siumut Manitsup siulittaasuata, Maniitsumut uteruni siulersuisut katersortissavai, naatsorsuutigaalu borgmesteri ilaasortanut nassuiaaqquneqassasoq.
