Sisimiut Kommuniat ikiuiumajunnaarpoq
Niuernermik ilinniartup Marie Lennertip Nuummiinnermini, Sisimiut Kommuneanut 15.000 koruuninik akiitsoqalissanngikkuni ernini pingasunik ukiulik qaammatini pingasuni aanakkuinut qimattariaqalersinnaavaa.
- Nuummeereerpugut. 1-eratta, 2-ratta 3-rattalu. Kingullerni marlunni meerara nassarniarakku kommunimut qinnuteqarama akuerineqarpunga.
Kisianni januaarip ulluisa tallimaanni aallarnissaminut atatillugu saaffiginnikkaluarami itigartitaavoq.
- Kommuniminngaanniit kalerrinneqarpugut oorinik atorsinnaasugut qaammammut 5.000 koruuninik. Taava nammineq taarsissagigut, taakkulu qaammatini pingasungajanni 15.000 koruuniussapput, Marie Lennert oqarpoq.
Marie Lennertip atuaqataasalu naammassinissamut ukiut marluk sinneruppaat.
- Nuummut atuariartortarnissat tamaasa naaatsorsussagutsigit taava 60.000 koruunit tungaanut akiitsoqalissaagut. Naammaginanngitsorujussuuartut isigaarput maani Sisimiuninngaanneersut taama pineqarnerput.
Kommunimit iluamik akineqanngikkuni ernini Sisimiunut qimattariaqassavaa.
- Meerara anaanaqarnermik, pingaartittorujussuugaluarakku ilaginissaa. Ilinniartut, ilaa, taamatut ooriuteqartigineq ajormata, taava qimaannartariaqassavara, taamatut inissisimanerput atuinnassagutsigu.
Niuernermik Ilinniartoq Marie Lennerti anaanaq kisimiittuuvoq. Marie Lennertip ilinniaqatai allat pingasut Sisimiuneersut aamma meerartamik nassarnissaannut itigartitaasimapput. Ilinniaqatigiit marluk ataatsimik, marlullu marlunnik meeraqarput.
Sisimiut Kommuneata inunnik isumaginninnermut immikkoortortaanit oqaaseqartitsiniaraluaratta iluatsitsinngilagut.