Sisimiut eqqaanilu aaqqiissutaagallartussamik Tele ulapputeqarpoq

Qaqqatoqqami sakkortusaavik qaammartit marluk ingerlaneranni marloria attaveerutereerpoq, attaveeruteqqissinnaallunilu.
juulip 30-at 2014 12:26

- Allanik ajutooraangatta paasisarparput suna ajoqutaanersoq, sermertoorneq pisuutaanersoq allallu. Taakkua atortut piikkagut maanga apuukkatsigit misissoratsigit paasivarput ajoquteqanngikkaluartut. Taamaammat assut kipiluttunarpoq massakkut ajornartorsiuterput, Karl Henrik Simonsen, Tele Greenlandimi sulisoqarnermut pisortaq oqarpoq.

Pingasunngormat innuttaasut nalunaaquttap akunneri arfineq marluk sinnerlugit attaveqanngillat, juunillu arferngani sakkortusaavik ullut arlallit attaveqanngilaq.

Satellitsikkut aaqqiissuteqarnissaq suliniutigilerpaat

Oqaatigineqarsinnaanngilaq taamatut pisoqaqqissanngitsoq, nalugamikkumi sunarpiaq ajutoornermut patsisaanersoq. Kisiannili satellitsikkut aaqqiissuteqarnissaq suliniutigilerpaat.

- Massakkorpiaq suliniutigaarput satellitsikkut aaqqiissuteqartarnissaq. KNI-kkut pisiniarfiillu allat aamma Ini a/s-kkut sinerissamut attaveeruttarput. Politiit aamma napparsimaveqarfiit internetikkut telefonikkullu attaveqarniarnerat upalungaarsimanermullu tunngatillugu satellitsikkullu ingerlanneqartarsinnaanerat sulissutigaarput. Kisiannili taamatut pisoqaqqissappat inuinnaat internetsimut attaveqanngittartussaassapput, Karl-Henrik Simonsen oqarpoq.

AAMMA ATUARUK Akunnerit arfineq marluk missaanni attaveeruteqqaneq

- Søkabileqartuuppat uku pisut pisassanngikkaluarput, Tele Greenlandimi sulisoqarnermut pisortaq Karl Henrik Simonsen oqarpoq.

Attaveeruttoornermi innuttaasut oqarasuaatinik angallattakkanik, oqarasuaatinik nalinginnaasunik, internetimik, VHF-imillu atuisinnaajunnaaraluarput kiisalu KNR-imit radiomik aamma TV-mik tusarnaarsinnaanatillu isiginnaarsinnaajunnaaraluarlutik.

KNIllu qitiusumik allaffeqarfia Sisimiuniimmat attaveerullunilu KNI-p pisiniarfiini akiliutinik akiliisinnaajunnaaraluarput, taamatuttaarlu Inissiaatileqatigiiffik INIp qitiusumik allaffeqarfia Sisimiuniimmat oqarasuaatikkut internettikkullu attavigineqarsinnaasimanani.