Sisimiunut ilinniariartortartut amerliartorput

Taakkua saniasigut qaartiterinermut qaarusunnilu sulinermut atuarfik nutaarluinnaq Sanaartornermut Ilinniarfiup ataaniittussaq aamma aallartilerpoq.

HTX –imi ilinniagaqartut holdit marluusaraluartut ukioq manna holdimik ataatsimik ilaqqinneqarput. Tassa inuusuttuaqqat meeqqat atuarfiini naammassisimasut katillutik 81–it HTX–erumallutik qinnuteqarsimammata.

Inuusuttut allat 70-it sanasutut, ruujorilerisutut qalipaasutullu ilinniagaqalerumasut aggustusip sisamaani aallartissapput.

Atuarfimmilu allami,Sanaartornermi Iinniarfiup ataani, nutaatut aallartilersumi inersimasut periarfissaqalerput qinnuteqarnissaminnut taannalu atuarfissaq tassaavoq Entreprenør og Bjergværksskole, tassaasoq aatsitassarsiorfinni qaarusunnilu sulisussanut atuarfik nutaaq, taanna aammattaaq Sanaartornermi Ilinniarfiup ataani inisissimalertussaavoq.

Atuarfimmi ilinniartitsissutigineqassapput qaartiterineq, isumannaallisaaneq aatsitassarsiorfinnilu suliarineqartartut allat ilinniartitsissutigineqassapput.

Sanaartornermi Ilinniarfiup pisortaa Jokum Møller oqarpoq, atuarfissap pilersaarusiornerani Norgimiut amerikamiullu qaarusunni sulinermik ilisimasaqarluartut suleqatigalugit atuarfissaq piareersarneqarsimasoq.

Atuarfik septembarip aallaqqaataani atulerpat atuartussat qassiussanersut massakkorpiaq oqaatigiuminaatsoq Sanaartornermi Ilinniarfimmit oqaatigineqarpoq, kisiannigooq qinnuteqartorpassuupput.

Aamma aggusti aallartilaarpat Dansk Teknisk Universitet-imeersut ingeniørinngorniat 60 – 70-it missaanniittut Sisimiuliassapput Artek-imi atuassallutik issittumi teknologi pillugu.

- Ingeniørinngorniat 2001–imi tikittalerput aatsaallu taamak amerlatigisut nunatsinnut tikissallutik, taama

oqarpoq Jokum Møller.

Sanaartornermi Ilinniarfiup DTU-llu arktisk teknologimut tunngasunik 1998-imili suleqatigiinnerat aallartippoq.