Sisimiuni uummammut aallartitsissutit ikkussorpaat
Alianartumik Maniitsup timersortarfiani toqusoqarnerata kingorna Kalaallit Røde Korsiat uummammik aallartitsissutit akikillillugit tuniniaavoq.
Periarfissaq tamanna Qeqqata Kommuniani timersornermut siunnersortip Karl Kasper Olsenip atorluarpaa. Tamatuma kingorna uummammik aallartitsissutit arfinillit Sisimiuni timersortarfeeqqami, arsaaffiup eqqaani, Sisorarfimmi, SSP-p illuutaani, Sisimiuni Qajap illuutaani kiisalu Kangerlussuarmi timersortarfimmi ikkunneqarput.
Maniitsup timersortarfia aamma uummammik aallartitsissummik inniminneereerpoq.
- Inuit allat inuunerannik peqqissusaannillu Kalaallit Røde Korsiat aningaasarsiornissaminik soqutigisaqanngilaq. Siulersuisut taamatut iliuuseqarniarneq inuit amerlasuut najuuttarfiini sumiiffinni amerlanerpaanik uummatinik aallartisaatit inissittariaqarneri pillugit oqallinnissamik aallartisaatissatut isigaa, Kalaallit Røde Korsianni allaffimmi pisortaq Kirsten Mortensen nalunaarpoq.
Uummannammik aallartitsissutit ikkunnerannut atatillugu atuisut pikkorissartinneqarput.
