Sisimiuni toqutsinermut atatillugu politiit innuttaasunut saaffiginnipput

Sisimiuni februaarip pingajuanni arfininngornerup unnuaani toqutsisoqarsimaneranut atatillugu Sisimiuni inuuttaasut politiit paasiniaanerannut atatillugu ikiortiserineqarput. Sisimiuni februaarip pingajuanni arfininngornerup unnuaani Louise Hegelund toqunneqarsimasoq nassarineqarpoq, taassuminnga unnuk taanna takunnissimasinnaasut politiit attaveqarfigerusuppaat. Innuttaasunut taama saaffiginninnertik vicepolitikommisærip John Thorsenip ima nassuiarpaa:

-Tassani ujartorparput sukkut ingerlaarsimanera taavalu sumiiffinni naapisimasimasinnaasai oqaloqatigerusullugit.

Saaffiginnissut kikunnut tamanut saaffiginnissutaavoq.

- Ukua ilagisimasi diskotekimi taavalu taasuma kingorna ingerlatigisimasinnaasai imaluunniit sumiiffimmi allami isersimaqatigisimasinnaasai oqaloqatigerusuppagut, aamma soorunami ilaginngikkaluarlugu aqqummi ingerlavigisimasinnaasaani takunnissimasut aamma taakku oqaloqatigerusukkaluarpagut.

Sisimiuni vicepolitikommissær John Thorsen aamma oqarpoq, Louise Hegelundip aqqa paasiniaanermut atatillugu avammut saqqummiunneqarnialermat qanigisai ilaqutaalu nalunaarigineqarsimasut. Sisimiuni innuttaasut politiinut oqarasuaatikkut saaffiginniffissaata normuraa: 86 42 22 tassa 86 42 22.