Sisimiuni sapaatiuppat mitaarniartut

Kulturikkut illorsuarmi Taseralimmi sapaatiuppat mitaartunik unammisitsisoqarniarpoq. Ileqqutoqqap tammatsaaliorneqarnissaa ineriartorteqqinneqarnissaalu aaqqissuussinermi siunertarineqarpoq. Unammeqataasut kulturikkut illorsuarmiiginnassanngillat, kingornali illoqarfimmi aamma meeqqanik inersimasunillu ersisaaralutik angalassamaarlutik!

Unammisitsinermut isiginnaariarneq peqataanerlu akeqanngilaq. Peqataasut unammisitsineq akunnerup affaanik sioqqullugu takkuteqquneqarput normussaminnillu tunisillutik. Atertik soorunami nalunaarutigissanngilaat, kikkummi mitaartuunersut eqqoriarnissaat nuannernerusarmat. Naliliisuussapput Klaus Filemonsen Kalattoortartut peqatigiiffianeersoq, Kirstine Knudsen erinarsoqatigiit Noqartimeersoq aamma  Kommunaldirektør Paneeraq Olsen. Unnuk taanna ilisarititsisuussaaq Otto-Mika Villumsen.