Sapaatip-akunnera imigassartorfiunngitsoq (sap.ak. 18) iluaqutaalersinnaanngilaq politikkikkut ilumoorunneqanngikkuni.
Taama kipiluttunartorsiorpalulluni Sisimiuni politeeqarfiup pisortaa, Hans Falck-Petersen oqarpoq, sapaatip-akunnerani ulapaarujussuareersimallutik.
-Imigassamik sassaalliinertalimmik nipilersorti-tsisoqarsimavoq, paasisinnaanngilara sooq sapaatip-akunnera 18-mut atatillugu poltikerit imigassamik sassaalliisinnaanermik akuersissummik tunniussisimanersut. Tamakkua imminnut ataqatigiinngillat, taama oqarpoq Hans Falck-Petersen.
Sapaatip-akunnerata naaneranut atatillugu pinngitsaaliilluni arnerisimanernik marlunnik nalunaarutiginnittoqarsimavoq, politiillu maannakkut misissuillutik suliaqaleruttorput.
Ikuallatsiteriartoqarsimavoq, imerniartarfinni pingasoriarluni eqqissiviilliortitsisoqarsimavoq, tallimariarlunilu aqqusinerni eqqissiviilliortitsisoqarsimavoq, tamakkualu saniatigut angerlarsimaffinni nipituallaamik nipiliornerit orninneqartarsimallutik. Tamakkua tamarmik imigassartorsimanermik pissuteqarsimapput.
- Imaanngikkaluarpoq pisarnermiit ulapaarnerusimasugut. Kisianniliuna sapaatip-akunnerani imigassartornaveersaarfiusumi tamakkua pinerat qisuarianngitsoorfigisinnaannginnatsigu taamatut oqaaseqarfigigivut, taama oqarpoq Hans Falck-Petersen, Sisimiuni politeeqarfimmi pisortaq.
