Sisimiuni piaaraluni ikuallatitsisaqattaartut ujarneqarput

Ippassaq unnukkut arfineq pingasut qeqqata missaani Fahlip Aqqusernani quimi ikuallattoqarmat qatserisartut ulappupput.

Politiit ikuallattumut apuunneranni ikuallattup naaralaarneri 15 meterisut portutigisimapput, qernertorsuarmillu pujuliorluni. Qatserisartulli ikuallattoq qamikkasuarpaat, piaaralunilu ikuallatitsisoqarsimasoq paasillugu.

Quiullu ikuallalernissaata tungaanut inunnik eqqaaniissimasunik takunnissimasunillu politiit ujaasipput.

Ilanngullugulu ilisimatitsissutigaat piffissami kingullermi ikuallannernut, piaaraluni ikuallatitsisoqarsimaneranik pasisanut, qatserisut qatseriartortariaqartarsimasut.

Piaaraluni ikuallatitsinerit pingasut
Pingasunngorneq juulip 23-ani ualikkut blok 4-p biilinut unittarfiani biili nummerpladeqanngitsoq ikuallappoq. Taannalu aamma piaaraluni ikuallatsitaavoq.

Sapaatip akunneralu qaangiummat, tallimanngorneq aggustip aallaqqaataani Paamaap Kuuani blok 9-mi sofa qimaannagaq ikuallatsinneqarsimavoq.

Sisimiuni sapaatit akunnerisa arlaqanngitsut ingerlaneranni pingasoria piaaraluni ikuallatitsisoqarsimasoq politiit oqaatigaat.

Ikuallannerni qujanartumik inunnik ajoqusertoqarsimanngilaq, piaaraluni ikuallatitsinerit inummit ataatsimit meeqqanilluunniit ikuallatitsinerusinnaasut Sisimiuni politiit ilimagaat.

Politiillu ikuallannernut tamanut takunnissimasunik ujaasipput, angajoqqaallu innuttaasullu allat kajumissaarpaat pasinarsinnaasunik pissusilersortoqarnersoq eqqumaffiginiaqqullugu.