Nannut qasserpiaat tamaaniinnersut suli ilisimaneqanngilaq.
Nannunik takunnittunut ilaavoq Maria Aarup.
-Arnami ikingutinni Amerlup tungaanut najugalimmi kaffisoriartortillunga, SMS-isivunga, kangerlummigooq nanoqartoq, siulliullunga qinngusersaalerpunga ersarivissumillumi assilillugit, Maria Aarup Sermitsiamut oqaluttuarpoq.
Sisimiuni mittarfiup eqqaani nannunik ulloqeqqata siorna aamma takusoqarpoq, eqqaavissuarmullumi qanittumi nannup tumaanik arlallit aamma takusimapput.
Sisimiut illoqarfiannut qanittumi nannunik takunnittoqassagaluarpat, tamanna erngertumik politiinut nalunaarutigeqquneqarpoq. Inuillu misissoqqissaaqquneqarput. Nannut imaaniittarput, puisitortuugamimmi, kaalluinnarunilli ileqqumittut tunuarsimaarunnaavittarput, sunaluunniillu nunami nerisinnaallugu.