Sisimiuni kalaallit kulturiat atuartitsissutigineqartoq
Ilinniarnertuunngorniarfimmi ilinniartut qilaat pillugu ilisimasanik qilaatillu qanoq atorneqarnissaanik sapaatit akunnerani immikkut sammisaqartinneqarput. Immikkut sammisaqarneq aqagu ullaap tungaani naggaserneqassaaq, tassanilu ilinniartut qilaasiatik takutissavaat Nunatsinni kulturikkut ileqqutoqqatta qanoq atorneqartarneranik takutitsissallutik.
-Siullermik atuagarsorneq ingerlanneqarpoq, H.C. Petersen-ip Michael Hauserillu atuakkiaat atorlugu tunngaviusumik Inngerutip inuiaqatigiinni qanoq atorneqartarsimaneranik aammalu inooqatigiittut inngernerup sunniutaanik siunertaanillu paasinnissaat siunertarineqarluni.” taama oqarpoq Kulturfagimi ilinniartitsisoq Dorthe Katrine Olsen.
Ilinniarnertuunngorniarfimmi ilinniartut kalaallit kulturikkut ileqqutoqaannik sammisaqartitsineq nuannarineqartupilussuuvoq, ullumikkummi tusaamaneqaannarluni atorneqarpianngimmat.
-Siulitta ulluinnarni inuunerminni atugaat paasisaqarfiginerussallugit pisariaqarsoraara, aammalu piffissanngorpoq aaqqissuussamik Kulturitsinnit kingornussagut inuusuttunik ilisimasaqarfigineqarnerunissaat” taama oqarpoq, ukiup siullermi GU-imi ilinniartoq qilaasioqataasorlu Sofie Skifte.
Ilinniarnertuunngorniarik immikkut sammisaqartitsinissamut ilinniartitsisussanik tikeraartoqarpoq, ilaatigut Leif Emanuelsen, taassumalu ilinniarnertuunngorniarfimmi ilinniartitsisut peqatigalugit ileqqutoqqap paasilluarnissaanik ilinniartut nassuiaallugit ilinniartippai.
-Fagit akimorlugit inuusuttunut immikkut sammitissallugu soqutiginarluinnartuuvoq, taamaammat Kulturfagi, Religioni aammalu Inuiaqatigiilerineq saqqummiiffigineqarput, taassumalu kingorna qangaanerusoq, ullumikkut atorneqarnera aammalu siunissami qanoq atorneqarsinnaanera eqimattani oqallissutigalugu isummersorfigigaat.” nangilluniluni:”Qilaatip sananeranut atatillugu isitassaanut ammit pisariupput, taamaammat Sisimiormiut ammerillaqqittortaasa ilaat Maria Lennert ikiortigilluarpaput, tamannalu qujamasuutigeqaarput, Dorthe Katrine Olsen nassuiaavoq.
