Sisimiuni friskoleliornialerput
Friskole meeqqat atuarfiannut pioreersumut atuarfittut allatut periarfissalittut isigineqassaaq, taama allapput Sisimiuni atuarfimmik namminersortumik aallartitsiniat nangillutillu:
Suliniarnermi tunngaviuvoq ilinniartitseriaaseq tamakkiinerusumik paasissutissiisinnaasoq atorluarusunneqarpoq, aammalu atuarfimmik minnerusumik toqqissisimanarnerusumik avatangiisilik, kiisalu atuarfik pitsaasumik perorsaariaasilik, atuartumut periarfissiisinnaasoq pilersikkusunneqarmat.
Sisimiuni friskole tassaassaaq friskole internationaliusoq, angajoqqaanit aqunneqartoq, Kalaallit Nunaannilu inuiaqatigiit naleqartitaannik aallaavilik. Siunertaraarput atuartut tunngaveqarluartunik internationaliusunillu sammivilinnik piginnaaneqalersissallugit, atuartullu namminneq ilinniarnerminni iliuuseqalersinnaalernissaat siunertaralutigu, taamaalilluni atuartup inuttut naleqassutsi nammineerluni misigisinnaalissallugu, aammalu meeqqap piginnaasai ineriartortissallugit, nammineerlunilu inuttut inuunini akisussaaffigalugu misigisimalernissaa, aammattaaq atuagarsornikkut inuttullu inuunermi maannamut siunissamullu inooqataaffigilernissaa anguniassallugu.
