Sisimiuni eqqartuussineq matoqqatinneqarpoq

Sisimiuni eqqartuussivimmi suliaq matoqqasumik aallartippoq. Tassa tusagassiortut allalluunniit najuukkumasut iseqqusaanatik.

Toqutsisuusorisap illersuisua Jens Paulsen piumasaqarpoq eqqartuussineq tamarmi matoqqasuussasoq, kisianni unnerluussisup Sisimiuni politeeqarfiup pisortaata Hans Falck Petersenip eqqartuussinerup ilaa ammatittariaqartoq piumasarigaluarpaa, taamaallaallu uppernarsaatinik saqqummiinerit matoqqasuussasut piumasarigaluarlugu, taama aviisi Sermitsiaq allaaserinnippoq.

Unnerluussisup illersuisullu piumasaat nalilersoreerlugit eqqartuussisoq Nikolaj Geisler aalajangerpoq, unnerluutigisap ukiukinnera allallu sugisai eqqarsaatigalugit eqqartuussineq tamarmi matoqqasuusariaqartoq.

Unnerluutigineqartoq pinngitsuunnginnerarpoq. Taamaakkaluartoq politimestereqarfimmit Henrik Pass radioavisimut ilisimatitsivoq, unnerluussisut piumasarigaat toqutsisutut pasisap sivisussusia killiligaanngitsumik Herstedvesterimiittussanngorlugu eqqartuunneqarnissaa piumasarineqartoq. Taamaassanngippat, pineqaatissinneqarsimasut inissinneqartarfianniittussanngortinneqarsinnaavoq ukiuni ikinnerpaamik arfineq-pingasuni toqutsisutut pineqaatissinneqarsinnaalluni.

Louise Hegelundimik toqutsisimasorisamik eqqartuussineq ualiartoq sisamanut unitsinneqarallarpoq, aqagulu ullaakkut qulingiluanut nanginneqassasoq, Henrik Pass ilisimatitsivoq.

Eqqartuussineq aqagu aqaguaguluunniit sisamanngornermi naammassineqassaaq.