Sisimiuni Brugseneeqqamut ujajaasoq pineqaatissinneqartoq
Angut kiinarpalerluni Sisimiuni Brugseneeqqami sulisut pingasut qunusiaralugit marsip 26-iani ujajaavoq 17.000 koruuninillu tillilluni.
Tyv1
Allattoq Simon Uldum -
maajip 08-at 2015 11:42
Angut kiinarpalik piniarfeeqqap tunuatigut matukkut iserpoq sulisullu qunusiaralugit aningaasivissuaq ammartippaa aningaasallu 17.000 koruunit missaat tillillugit. Ujajaasoq kingorna arpalluni qimaavoq.
AAMMA ATUARUK Sisimiuni ujajaasup assingi politiit saqqummiuppaat
Piffissami sivisuumi misissuisoqareersoq suliarlu ingerlanneqareersoq Qeqqata Eqqartuussiviani angut 32-nik ukioqartoq maajip arfernani 2015-imi pineqaatissinneqarpoq. Unnerluussisussaatitaasup piumasaqaateqarneratigut ukioq ataaseq pinerluuteqarsimasunut inissiisarfimmiittussanngortinneqarpoq 17.000 koruuninillu taarsiisussanngortitaalluni, Qeqqata Politiivi tusagassiorfinnut nalunaaruteqarlutik ullumi taama allapput.
Eqqartuunneqartup eqqartuussut akueraa ingerlaannarlu pinerluuteqarsimasunut inissiisarfimmukaanneqarpoq.
AAMMA ATUARUK Politiit Brugsenimut tillinniartoq saqqummiunniarlugu siorasaarisut
