Sisimiuni biilit igalaaminikkut maanna ingerlaartalerput!

Tamanna Sisimiuni aaqqissuussinerup nutaap ukiup ataatsip matuma siornagut atuutilersinneqartup kinguneraa, taamanimi Sisimiormiut kajumissaarneqarput eqqakkatik igalaaminerit qillertuusakullu immikkoortillugit containerinut igittassagaat.
Allattoq Elisa Isaksen
aggustip 26-at 2013 07:02

Sisimiormiut ukiup ataatsip ingerlanerani igalaaminernik 60 kubikmeterit missaanniittunik katersisimapput, tamakkulu sequtseriarlugit illoqarfimmi asfaltilersuinermi aasaq manna ilaatinneqarlutik. Igalaamerngit sequtsikkat 7 kubikmeteriusut, asfalterinermi ujaraaqqanut sioqqanullu taarsiullugit atorneqarput.

Aamma igalaaminernik akuneqarsimasutigut asfaltikkut ingerlaartilluni assakaasunik qaartoornissaq ernummatigisariaqanngilaq.

- Igalaamerngit ujaraaqqatut ilusinitsillugit sequtserneqartarput. USA-mi 1970-ikkunili asfaltimut igalaaminernik akoorisarput, ingerlatsinermi pisortaq Jacob S. Lundgaard oqarpoq.

Kangerlussuarmiut ukiap ingerlanerani aamma igalaaminernik qillertuusanillu immikkoortiterisinnaanngussapput. Maniitsormiut igalaaminernik qillertuusanillu siunissami aamma immikkortiterisinnaanngornissaat pilersaarutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq