Sisimiuni atuarfiit pisinnaatitaaffinnik tunngavillit: Meeqqat pisinnaatitaaffitik ilikkarlisigit

Qeqqata Kommunia UNICEF Danmarkilu atuarfinnik pisinnaatitaaffinnik tunngavilinnik aallartitsiniarlutik suleqatigiilerput.
Qeqqata Kommunia UNICEF Danmarkilu UNICEF-ip nunani tamalaani atuarfinnik pisinnaatitaaffinnik tunngavilinnik ingerlatseriaasiata atulernissaanut suleqatigiilerput. Assi © : UNICEF
juunip 01-at 2020 11:13

- Atuarfik pisinnaatitaaffinnik tunngavilik tassaavoq atuarfimmi ingerlatseriaaseq meeqqat pisinnaatitaaffii pillugit isumaqatigiissummik tamakkiisumik tunngavilik,

UNICEF-ip Kalaallit Nunaanni suliniutinut pisortaa Sara Olsvig oqarpoq.

Qeqqata Kommunia UNICEF Danmarkilu UNICEF-ip nunani tamalaani atuarfinnik pisinnaatitaaffinnik tunngavilinnik ingerlatseriaasiata atulernissaanut suleqatigiilerput.

Meeqqat pisinnaatitaaffii akuutittuarlugit

Sisimiuni Minngortuunnguup Atuarfia Nalunnguarfiullu Atuarfia siuttuusutut ukioq maanna aallartipput.

Atuarfiit pisinnaatitaaffinnik tunngavillit suuppat?

UNICEF-ip atuarfiini pisinnaatitaaffinnik tunngavilinni atuartut, angajoqqaat, ilinniartitsisut atuarfimmilu sulisut allat Naalagaaffiit Peqatigiit Meeqqat Pisinnaatitaaffii pillugit Isumaqatigiissutaanni naleqartitat tunngavigalugit ataatsimoorlutik ingerlatseriaaseqarput.

Atuarfik inissaqartitsinermik, ataqqeqatigiinnermik, toqqissisimanermik, pimoorussinermik akisussaaffeqarnermillu tigussaasorujussuarmik tunngaveqarpoq, taama ilinikkut naleqartitat oqaasiinnaanatik iliuutsini tamani malunniuteqarlutik.

Misissuinerit tamaasa takutippaat meeqqat pisinnaatitaaffimminnik ilisimaarinnittut paasinnilluartullu inuunerissaarnerullutillu imminnut ataqqeqatitigiinnerusartut ataqqinartitsinerusartullu.

Najoqqutaq: UNICEF

- Tassanilu tassa atuartut, ilinniartitsisut, sulisut allat minnerunngitsumillu angajoqqaat tamarmik akuutillugit, suleriaasermik allannguilluinnanngikkaluarluni, isiginnittaaseq taavalu ulluinnarni sammisaqarnerni meeqqat pisinnaatitaaffii akuutittuarlugit ingerlatseriaasermik imaqarpoq, Sara Olsvig oqarpoq.

Suleriaatsimi meeqqat qitiulluinnassapput.

- Meeqqat peqatigalugit atuarfimmi atortut, init sutigut tamatigut toqqissisimartuunissaat aaqqinniarneqartarpoq.

- Assersuutigalugu quiartorniaraanni toqqissisimartuutinnissaa imaluunniit arlaatigut atuarfiup immikkoortortaqarfiata arlaannut piniaraanni meeraalluni immaqa toqqissisimananngissinnaasutut misinnarsinnaasoq qulliit immaqa ikinneq ajorlutik, Sara Olsvig oqarpoq.

Atuarfinni pisinnaatitaaffinnik tunngavilinni meeqqat pisinnaatitaaffii maleqqissaarnissaat pingaartinneqartarpoq. Tassanilu aamma meeqqat atuarfimmi aalajangeeqataanissaat qulakkeerneqarsinnaavoq.

- Atuartitsinerup ingerlanissaani kisianni aamma atuarfiup ineriartortinnissaani.

Meeqqat amerlanerussuteqassapput

Assersuutigalugu siunnersuisoqatigiinnik pilersitsisoqartarpoq, tassani atuarfiup ingerlanneqarnera suleriaatsinillu tunngasunik aalangiisoqartarpoq.

- Uanilu suleriaatsimi pingaarluinnartut ilagivaat meeqqat amerlanerussuteqartuaannassasut, Sara Olsvig oqarpoq.

Taamatullu ingerlariaaseqarnermi nunani tamalaani meeqqat imminnut ataqqinerusartut takuneqarsinnaasoq, Sara Olsvig nassuiaavoq.

- Nunani tamalaani taamatut ingerlatsiviusuni, ingammik taanna siuariaateqarfiusartoq takuneqartarpoq, tassa ataqqeqatigiinneq. Taassumallu aamma kingunerilluarsinnaasarpaa qinngasaarunnerit nikassaanerillu annikillinerat.

Piffissaq misileraaffiusoq qaangiuppat nunatsinni atuarfiit suli amerlanerusut atuarfittut pisinnaatitaaffinnik tunngavilittut periuseqalernissamut periarfissaqalissasut pilersaarutaavoq.

Atuarfiit misiliutaasut aallartisarnissaannut aningaasaateqarfik Østifterne periarfissiisuvoq, aamma UNICEF-ip Danmarkimi atuarfinnik pisinnaatitaaffinnik tunngavilinnik ingerlatsineranut aningaasaliisuusoq.