Sisimiut Kommunianni siullerpaamik ukiuunerani umimmanniartoqarsinnaalissaaq.
Sisimiut Kommunianni umimmaat 100-t pisarineqarsinnaasut, Avatangiisinut Pinngortitamullu Pisortaqarfiup aalajangerpaa.
Maniitsulli Kommunianut tunngatillugu umimmattassat qummut killilerneqanngillat.
Tassa Kangerlussuup kujataatungaani umimmaat ikilisinneqartariqarput, amerlanerpaaffigisinnaasartik massakkut angulermassuk, umimmaallu nerisassalerngusaatilersimammata. Tamatumunnga takussutissaavoq norrisarnerisa annikilliartornerat, taamaattumik ukioq-manna ukiuunerani piniarnissami piffimmi tamaani umimmattassat killilerneqanngitsut, Pisortaqarfik allappoq.
Pisassiissutigineqartut kommunimi nammineerluni inuussutissarsiutigalugu piniartunut sunngiffimmilu aallaaniartartunut agguaanneqassapput.
Ukiuunerani umimmanniarnissaq februaarip ulluisa aallaqaataanniit marsip ulluisa qulingata tungaanut ingerlanneqassaaq.