Soraarnerusutisiassamut katersat: SISA naalakkersuisorlu isumaqatigiissuteqartut
Akileraartarnermut Aqutsisoqarfiup soraarnerussutisiaqalernissamut aaqqissuussamut suliarinnittussarsiuussinerani Sulinermi Inuussutissarsiuteqartut Soraarnerussutisiaqalernissamut Aningaasaateqarfiat SISA isumaqatigiissuteqarluni atsiorpoq.
Tamanna Aningaasaqarnermut naalakkersuisoqarfiup SISA-llu KNR-imut uppernarsarpaa.
Soraarnerussutisiaqalernissamut aningaasaateqarfiup SISA-p soraarnerussutisiaqarnissamut aaqqissuussinermut pinngitsoorani ilaanissamik aqutsisuunissani pillugu Namminersorlutik Oqartussanik ukiuni qulini atuuttussamik isumaqatigiissuteqarluni 2018-imi aggustimi nalunaarutigaa.
Tamatumunnga atatillugu, SISA inatsisinik malinnilluni sullitani amerlisillugit nunatsinni tamaneersut sullisisinnaanerluni aningaaserivinnik nakkutilliisunut taanami nalileeqqusivoq.
SISA-llu inatsisit taamani atuuttut naapertorlugit sullinniakkani tamaasa sullissinnaanngikkai aningaaserivinnik nakkutilliisut taamani naliliivoq.
Taamaammat Namminersorlutik Oqartussat suliariumannittussarsiuusseqqipput. Taanna jannuaarip ulluisa 15-ianni ulloqeqqanut killeqarpoq.
Inatsimmummi tapiliussaq Folketingimit decembarimi akuersissutigineqarpoq, SISA-lu taamaalilluni nunatsinni innuttaasut tamarmik soraarnerussutisiassaannik aqutsisuunissaminut periarfissaqalerluni.