SISA aalisarnermut akulerukkusulersoq

Soraarnerussutisiaqarnermut aningaasaateqarfik, SISA, sinerissap avataani aalisarnermik ingerlatsinissamik siunertaqarpoq. Taamaattumillu ingerlatseqatigiiffimmik, Avalleq ApS-imik, apriilip 25-anni pilersitseqataavoq. Tamanna suliffeqarfiit nalunaarsorsimaffianni, cvr.dk-mi atuarneqarsinnaavoq.

Avalleq ApS sinerissap avataani qaleralinniarusullunilu saarullinniarusuppoq. Pisassanik Naalakkersuisunut qinnuteqaat maanna utaqqivaat. Soorliuna soraarnerussutisiaqarnissamut ileqqaarfik aalisarnermut akulerukkusulertoq?

- Qangali SISA-mi siulersuisut kissaatigisimavaat aamma aalisarnermut inerisaaqataasinnaagutta aamma aalisarnerup iluani aningaasaleerusulluta, SISA-mi siulittaasoq, Jess G.Berthelsen, KNR-imut oqarpoq.

Soraarnerussutisiassanik ileqqaarfiit aalisarnermut ukiortaamit inatsisitaaq naapertorlugu aningaasaliisinnaapput. Tamannalu soraarninngortussat aningaasaataannik amerlanerulersitsisinnaasutut neriuutaavoq.

- Neriulluta tassani amerlanerusunik erniaqartitsisinnaassalluta ilaasortatsinnut 40.000-nut iluaqutaasussanik, Jess G.Berthelsen oqarpoq.

Piginneqatigiit

SISA-mi siulersuisunut allattoqarfimmi pisortaq, Pâviâraq Heilmann, ingerlatseqatigiiffimmi nutaami siulittaasuuvoq. Ingerlatseqatigiiffimmik pilersitseqataasut ilaat, aamma aalisarnermut naalakkersuisuusimasoq, Karl-Kristian Kruse, tassani pisortaavoq.

Suliffeqarfiit nalunaarsorsimaffianni allassimasut naapertorlugit ingerlatseqatigiiffik nammineq 40 tusind koruuninik aningaasaateqarpoq. Piginnittut tassaapput, SISA, Karl-Kristian Kruse, Nikolaj Therkelsen aamma Knud Lyberth Poulsen. SISA 10.000 koruuninik aningaasaliisoq Jess G. Berthelsen oqarpoq.

Taassuma sooq taakkorpiaat piginneqataanersut oqaasertalerumanngilaa. SISA-li aningaasaleeqataanissamut periarfissinneqarsimavoq.

- Taanna annertunerusumik pulaffigisinnaanngilara kisianni saaffigineqarpugut aningaasaleeqataasinnaanerluta. Taannalu akorluarparput.

Jess G. Berthelsenip kina imaluunniit kikkut SISA-p aningaasaleeqataasinnaaneranik neqeroorsimanersut oqaatigiumanngilaa.

Neriuttut ajutoorsinnaasulli

Naalakkersuisut siulii ukioq manna februaarip arfineq-aappaanni tusagassiorfinnut nalunaarumminni allapput, nunatta kitaani avataasiorluni qaleralittassiissutit 4.600 tonsit, saarullittassat 1.950 tonsit aamma nataarnartassiissutit 166,6 tonsit ingerlataqartunut soqutiginnittunut neqeroorutigineqassasut. Avalleq ApS-illu periarfissaq taanna atorlugu qinnuteqartoq, pisortaq, Karl-Kristian Kruse, KNR-imut ilisimatitsivoq.

Qinnuteqaalli ingerlatseqatigiiffimmut pitsaanngisumik kinguneqarpat ingerlatseqatigiiffik atorunnaassaaq.