Siriusikkut aasaanerani unikkallarput

Siriusimi nakkutilliisut qaammatit sisamat ullullu 14-it Kalaallit Nunaata avannaarsuani qimusserlutik angalasimapput, aasarissimmallu nakkutilliiunnaarallarput, qimussillu arfinillit Daneborgimut utersimalerput. Nakkutilliisunut ilaavoq Thomas Hansen, 30-nik ukiulik, 3700 kilometerinik qimmini qimutsigalugit qimussersimasoq, nannunillu qulinik naapitsisimasoq.

- Angalatilluta unikkaangatta ikioqatigiittarpugut,

aappa tupermi apummik sermimilluunniit aatsitsilluni kissartuliortarpoq nerisassiortarlunilu, aappaatalu tupeq qajannaarsortarpaa qimmillu nerukkartarlugit, pisattanillu qajannarsuereeraangami tupermut aatsaat isertarluni, nerereeraangatta najoqqaareeraangattalu innannginnitsinni oqaloqatigiittarpugut atuarujoortarlutaluunniit, Thomas Hansen oqaluttuarpoq, nangillunilu:

- Qaammat sinnerlugu mulusartilluni angalaqatigisartagaq qanimut ilikkarneqartarpoq, ikinngutigiillualernerlu taamaalilluni aamma pinngortarluni.

- Ilaanni pissanganartorsiortarpugut,

ilaannikkullu inuttulli allatut assortuussinnaasarpugut, assortuunnerlu qaangerneqareeraangat, qimusserluta alapernaarsuinerput nangeqqittarparput.

- Ingerlaarfissarput aalajangersimaqqissaartoq alapernaarsuiffigisaratsigu kiisalu ilisimasassarsiortoqartillugu taakkua aamma nakkutigeqqissaarniartarpavut. Kiisalu aamma ummasunik naapitsisarpugut, Tunup avannaarsuaniitilluta imarnersalimmi illuaqamiitilluta nannut qulit, piaqqisartut nannullu utoqqaat arajutsinianngillutik ornittarpaatigut, qimmivut illuararpullu tikippallaaraangatigit, ersisaarlugit qimaatinniartarpavut, aallaajumanatigillu seqqortaarluta ersisaartarpavut. Angalanerput nuannertartorujussuuvoq, Siriusikkunni nakkutilliisoq, Thomas Hansen oqaluttuarpoq.

Tunup Avannaarsuani qimussimik nakkutilliisut arfinillit upernassaq angalatinneqarsimapput, 17.000 kilometerillu taakku ingerlaarfigisimavaat.