Sipaarniutissaq isumaqatiginngivippaat

Takornariaqarnermik suliffeqarfissuit timmisartuutileqatigiit Air Greenland, aamma umiarsuaatileqatigiiffik Arctic Umiaq Line, Nunatsinni takornariaqarnermik inuussutissarsiuteqarnermillu siunnersuisoqatigiit annertuumik sipaarniarfigineqarnissaat mianersoqqussutigaat. Sermitsiami ullumi saqqummersumi tamanna allaaserineqarpoq.
Allattoq Carla Davidsen
septembarip 23-at 2011 06:25

Atorfilittat allakkiaat naapertorlugu takornariaqarnerup iluani katillugit 3,8 millionit koruuninik sipaartoqarnissaa naalakkersuisoqarfimmit pilersaarutigineqarpoq.

Aningaasat taakku Nunatsinni suliffeqarfiit uuliasiornikkut aatsitassarsiornikkullu kiffartuussisuusut siuarsarnissaannut atorniarneqarput.

Sipaarniarnerit taakku piviusunngussappata siunnersuisoqatigiit aningaasaqarnerat 2010-mut naleqqiullugu pingajorarterummik annikillissaaq, siunnersuisoqatigiimmi taamani 22 millionit koruuninik pissarsipput, Sermitsiami allapput.

Air Greenlandimi pisortaanerup, Michael Binzerip, Namminersorlutik Oqartussat sipaarniarnerat anguniagaqannginnermut takussutissaasutut nalilerpaa. Tikkuarpaa takornariaqarnerup iluani siuarsaaniarnermik Island Nunatta ilinniarfigisinnaagaa.

- Islandimi aningaasaqarnikkut ajornartorsiortoqalermat nunap ussassaarutigineqarneranut suli amerlanerusut aningaasaliissutaapput, tassani siuariartoqarnissaa qulakkeerniarlugu. Nunatsinnili akerlerluinnaanik ilorpugut, Michael Binzer Sermitsiamut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq