Siorna toqutsisoq eqqartuussaavoq

Akunnerup affaa qaangiuppat aasaq Nuup ilaani Nuussuarmi toqutsinermut atatillugu pineqaatissiisoqassaaq.

Juulli sioqqullugu Nuummi Eqqartuussiviup angut 48-nik ukiulik ukiuni tallimani pinerluuteqarsimasunut inissiisarfimmiittussanngorlugu pineqaatissippaa. Ippassaq ulloq naallugu Nunatta Eqqartuussiviani pisimasoq uteqqinneqarpoq. Angutip pineqaatissinneqarnini suliareqqitassanngortimmagu.

Imigassamik sakkortuunik iisartakkanillu atornerluineq Nunatta eqqartuussivianut ippassaq tusarnaariarsimasut tusarsinnaavaat. Angut 48-nik ukiulik unnerluutigineqarpoq arnamik imeqatigisartakkaminik aasaq kingulleq juulip qulingiluaanni ipitillugu toqutsisimasutut Nuup ilaani Nuussuarmi. Unnerluutigineqartup ilisimannittullu allat imigassamik iisartakkanillu atornerluineq sakkortooq oqaluttuaraat, toqutaasoq peqatigalugu spritsitortarnertik iisartakkanillu sianiutigissaatinik merianngunaveersaatinillu atornerluinertik oqaluttuaralugu.

Soorlu unnerluutigineqartup ulloq toqutsiffiusoq sioqqullugu iisartakkanik merianngunaveersaatinik tallimanik sianiutigissaatinillu sisamanik iisartagartorsimavoq sprititorlunilu.

Ilisimannittut ilaat nalorninartorsiortitsivoq taassuma eqqartuussivimmi oqaluttuaa upperineqassappat eqqartuunneqartup pineqaatissinneqarnera atuuttussanngortinneqassaaq. Akerlianik eqqartuussivik isumaqarpat taanna upperisassaanngitsoq soorlu atornerluisuunermigut eqqarsartaatsimigullu napparsimanermigut taava tamanna unnerluutigineqartumut iluaqusiisinnaavoq,

Pineqaatissiineq ullumi ataatsinut pissaaq – unnerluussisup ukiut tallimat pinerluuteqarsimasunut inissiisarfimmiitinneqarnissaa piumasaraa – illersuisup pinngitsuutinneqarnissaa piumasaralugu.

Toqutsisimanermut unnerluussinerup saniatigut sioorasaarisimanermut tunngasoq eqqartuussiviup aalajangiiffigissavaa. Unnerluussummut tassunga 48-nik ukiulik pisuutitaareerpoq.