Siorna tammaaneqartut timaat nassaarineqarput

Qeqertarsuup avannaatungaani Qeqertasussummi sapaatip akunnera kingulleq politiit inuit timaannik toqungasunik nassaarput. Toqungasut timaat pingasut tassaapput siorna augustip qaammataani maqaasineqartut timaat. Naak sukumiisumik taamani ujaasisoqaraluartoq nassaarineqanngillat.

Angutit 34-inik 40-inik 43-illu ukioqartut Qeqertarsuarmut arsaakkiarput. Naak unnuakkut anorsarikkaluartoq sapaammi aggustip ulluisa arfineq-pingajuanni ukioq kingulleq ullaakkut Aasiannut angallammik angerlarniarlutik aalajangerput.

Silamik ilimasaarut taamanikkut ajunngilaq anoraa suialaaginnartussaasoq ilimasaarutaagami.

Nalunaaqutaq arfineq marluk arfineq pingasullu akornanni Qeqertarsuup umiarsualivianit umiatsiaaraq With 300 ammaannartoq isikkanik qulinik angissusilik atorlugu avalapput. Umiatsiaaraq aquuteralarujussualerlugu aallarput. Angutit taakku pingasut Aasiannut apuutinngillat. Sukumiisumillu ujarneqalerput.

Alapernaarsuut ”Agdlek” ujaasivoq timmisartorlu aamma peqataatinneqarpoq. Qeqertasussuk ujakkanik nassaarfiusoq killigalugu timmisartoq ujaasivoq alapernaarsuullu Qeqertasussuup eqqaani aamma ujaasilluni. Ujaasineq ulluni qulingiluani ingerlanneqareerluni unitsinneqarpoq.

Aasianni politiit pisortaata taamani inuit taakku pingasut ajunaarsimanissaat ilimagalugu nalunaarutigaa. Ajunaarsimanngillalli.

Umiatsiaaqqamiillutik Qeqertasussummut tipisimapput. Tassani assigiinngitsunik oqqiffissaminnik illuaqqiorsimapput.

Qanoq sivisutigisumik uumasimassanersut ilisimaneqanngilaq. Perlerlutik qilallutilluunniit toqusimanersut imaluunnit arlaannik toqquteqarsimanersut ilisimaneqanngilaq.

Ilulissani politiit sapaatip akunnera kingulleq aalisartunit kalerrinneqarput. Qeqertasussummi eqqumiigisaminnik takusaqarsimasunik. Eqqumiigisaat tassaavoq illuaqqiaq tassanilu inuit pingasut timaat politiit nassaaraat. Toqungasut qaammatip uuma ulluisa aqqaneq-aappaanni kinaassusersineqarput. Angutit taakkua pingasut kikkuuneri ilaqutaannut nalunaarutigineqareerput.