Sinniisoqarfeqarnissamut akissaqanngillat

Nutartigaq 18:00

Islandimi Savalimmiunilu immikkut konsulaateqarfeqarput, Kalaallit Nunaannili konsulaateqarfeqartoqarani.

Aningaasakilliorneq Naalakkersuisut itigartitsinerminnut peqqutaanerarpaat.

Taamaakkaluartorli Nunatsinniit aallartitaqarsinnaaneq qanoq atorfissaqartinneqartiginersoq misissorneqassaaq. Taama isummersorneq Inuit Ataqatigiit Demokraatillu isumaqatigiissutigaat:

- Siunnersuut akissaqannginneq pissutigalugu akerleraarput, Justus Hansen oqarpoq.

Taassumali sinniisuuteqartitsisinnaaneq isumassarsiatsialaanerarpaa.

- Periarfissat takusinnaavakka, piffissarli pitsaanerulerpat aatsaat sinniisuutitaqarsinnaalluta isumaqarpugut, Justus Hansen oqarpoq.

Siumumiilli isumaqarput, sinniissoqarsinnaaneq maanna misissorneqassasoq. Tamanna namminersulersimanitsinnut alloriarfissaasoq oqarput.

- Pingaaruteqartorujussuuvoq ullumikkut killiffigisarput eqqarsaatigalugu, Nunat avannarliit killiit suleqatigiinnerat ineriartorteqqissallugu. Tassuunakkut ineriartorteqqissagutsigu, pingaaruteqarpoq attaveqaammik orninneqarsinnaasumik pilersitsisuugutta, Ruth Heilmann oqarpoq.

Ruth Heilmann aamma oqarpoq, Kalaallit Nunaata sinniisoqarsinnaanera Islandip Savalimmiullu naatsorsuutigigunaraat.

Ruth Heilmann isumaqarpoq, sinniisoqarnissaq akisuallaarnavianngitsoq.

- Aallaqqaammut angisoorsuusariaqanngillat. Aallaqqaammut annikitsuusinnaavoq. Periarfissamik ammaassineq tassani aqqutissiuunneqarsinnaavoq, kisianni soorunami kingusinnerusukkut ineriartortinneqarsinnaalluni, taama oqarpoq Ruth Heilmann.

Justus Hansenip paasisinnaanngilaa, Siumut siuttuugallarami sinniisumik sooq ammaasimannginnersoq.

- Oqariartuutaat paasisinnaavara. Oqaluttarfimmili oqaatigaara, illuatungiliuttunngoramik sooq siunnersuuteqassappat aningaasat tassunga atorneqassasut. Naalakkersuisuugallaramik sooruna taamaattumik ammaasimanngillat? Taamanimi aningaasaqarneq aamma ajunngitsumik ingerlasimagaluartoq paasisinnaanngilara sooq taamani sinniisoqarfimmik ammaasimannginnersut.

Ruth Heilmann isumaqarpoq Namminersulereernitta kingorna sinniisoqarnissaq aatsaat maannakkut pisariaqartinneqalersoq. Aamma isumaqarpoq Nunani Avannarlerni Killerni sinniisoqarnissaq pingaaruteqartoq.