Sinneqartoortup sullissinera iluarineqanngilaq
Atuisulli allatorluinnaq misigisaqartarput, januaarip 21-ani Qanoruumi apersorneqarluni Rebekka Broberg Petersen Sisimiuniittoq imak oqarpoq:-Quujanaattorujussuuvoq, qaammatit pingasunngulerpaat taamaaginnaavillutik, utaqqisunik ulikkaartuaannaavippoq, inuit tunuleriiaallutik utaqqiinnaavissut, taavalu pisiniarfinni imaaliannaaq tigusisoqarsinnanani, tigusinissaq killeqartarami.
Grønlandsbanken aningaasartuutissaminik suliffeqarfittut allatulli tulleriiaarisarpoq, qinigassaasorlu uani tassaavoq sullitaminut aningaasanik aallerfiusinnaasunik amerlanerusunik inissiineq imaluunniit ukiup naanerani sinneqartoorneq anginerusoq, taamaattumillu piginnittunut amerlanerusunik agguagassiineq Martin B. Kviesgaard, GrønlandsBanken-imi pisortaq tassunga imak oqarpoq:-Imminnut akerleriittutut taakkua isiginngilakka, soorunami sullitatsinnut pitsaasumik sullissisussaavugut, tamannalu aamma ingerlaavartumik misissuiffigisarparput, tassa sumiiffinnut assigiinngitsunut eqqortumik sullissisussaavugut.
Qanorpiaq pitsaanerusumik sullissineq anguneqarsinnaasoq imak GrønlandsBanken-imi pisortamit erseqqissarneqarpoq imak:-Iliuuseqarpugut assigiinngitsunik, Sisimiuni ajornartorsiutit qaangerneqareerput, massakkullu nalilersorparput suli sullissinerput pitsanngorsaavigissanerlugu. Nuummi aningaasanik tigutsivinnik arlalinnik inissiinikuuvugut, massakkullu allani taamak iliussanerluta eqqarsaatersuutigalugu.
Martin B. Kviesgaard ilisimatitsivoq ukioq manna naliliiffittut atorneqassasoq, tamassumalu kingorna sullissinerup pitsanngorfiginissaa aalajangiiffigineqassasoq.
