Pinerluuteqarsimasut angerlarsimatiinnarlugit singernerisigut kalerrisaaruserlugit pineqaatissinneqartalernissaat Kalaallit Nunaannut naleqqutinngilaq.
Taama oqarpoq inatsisinik atortitsinermut ministeri Lene Espersen, inatsisartunut ilaasortap Astrid Fleischer Rexip apeqquteqaataanut akissummini. Ministerip ilaatigut Eqqartuussiveqarneq pillugu Ataatsimiititaliarsuup taamatut aaqqiissuussisinnaanermut isummersuutai itigartitsineralu tunngavilersuutigai.
Tassami ataatsimiititaliarsuup inuiaqatigiinnik kiffartuussineq iliuusissatut pilerigineruaa aamma Nunatta isorartunerujussua nakkutilliilluni angalasarnissanut aningaasartuutaanissaa matumani tunngavilersuutigineqarput.
Taamaattumik pinerluuteqarsimasunut singernikut kalerrisaarusersuinissaq nunatsinni maannakkut eqqarsaatigineqanngilaq. Eqqartuussiveqarnerup aaqqissuuteqqinneqarneranut atatillugu Nunatsinni Eqqartuussiveqarneq pillugu Siunnersuisoqatigiinnik pilersitsisoqassaaq. Siunnersuisoqatigiinngortussallu apeqqut tamanna kingusinnerusukkut isummerfigisinnaajumaaraat Lene Espersenip akissummini oqaatigaa.
