Sinersortaatip ingerlaannarnissaa ilimanarsivoq

Assartuusineq pillugu isumalioqatigiissitap siunnersuutigisimagaluarpaa, Sarfaq ittuk unitsinneqarluni timmisartukkut angallanneq piorsaavigineqassasoq.

Aningaasaqarnermut Ataatsimiitsitaliami ilaasortaq, Siumumeersup Per Berthelsennip, nuannnaarutigaa sinersortaatsip Sarfaq Ittuup ingerlaanarsinnaaneranik nalunaaruteqartoqarnera.

- Soorunami naammaginanngikkaluarpoq aningaasanik tapiissuteqartuarneq, kisiat tassa allanik periarfissanik pilersitsisinnata tamakkua akuerisariaqarpavut. Takorlooruminaatsippara, silaannakkut angallannerup, immakkut angallannertuulli akikitsigilersinnaannissaa, Per Berthelsen oqarpoq. 

Arctic Umiaq Line, aningaasanik amigartooruteqarluni ingerlasoq, pisortanit ukiumoortumik  amigartooruteqannginnissamut qularnaveeqquserneqartarpoq, ukiumut 12 millionit koruunit missarluinnaannik. 

- Aningaasat annertoqaat, nalunnginnatsigumi aamma nunatsinni aningaasakilliorluta, kisianni oqarnertut pisussaaffeqarpugut nunami siammaseqisumi inoqarfiusumi, innuttaasut sapinngisamik pitsaasumik sullinniassallugit. Tamannalu aamma pinngitsoornani, aningaasanik naleqartussaavoq, Per Berthelsen oqarpoq.

Attaveqarnermut ataatsimiititaliap siulittaasua, Demokraatineersup Justus Hansenip apriilip tallimaani radioaviisimi apersorneqartilluni Assartuussineq pillugu isumalioqatigiissitap siunnersuutertik saqqummiuttareeraat, tassa sinersortaatsip matuneqarluni timmisartunik angallannerup piorsarneqarnissaa pillugu ima oqarpoq. 

- Immakkut assartuutsip matuniarneqarmat paasisinnaavara, uangalu tamanna nammineq isumaqatigaara. Taanna aningaasartuutini annertuutut inissisimavoq.

Justus Hansen demokraatit sinerlugit inatsisartuni ilaasortaq, apriilip tallimaani radioaviisimi apersorneqartilluni taamak oqarpoq.

Parteeqataa, Aningaasaqarnermullu ataatsimiitsitaliami ilaasortaasoq Andreas Uldum, Sarfaq Ittuup ukiuni tulliuttuni tallimani ingerlaannarsinnaanissaa qulakkeerneqarsinnaanissaa ilimanarsisorlu ima oqarpoq.

- Tassa paasinarsissooq paasissutissat takoriarutsigit, qanoq aalajangiinissarput, Andreas Uldum oqarpoq.