Sinerissatta imartaata naqqa misissuiffigineqartussanngoqqippoq

Sinerissami immap naqqata misissuiffiginissaanut Pinngortitaleriffik, nunat allat peqatigalugit aningaasaliiffigineqarsimavoq. Nunatsinni Pinngortitaleriffiup ilisimatuutut misissuiviit Islandimiit, Savalimmiuniit, Norgemiit, Ruslandimiit, Canadamiit USA-meersullu peqatigalugit immap naqqata qanoq innerata, uumassusillillu qanoq nakkutigineqarsinnaanerinut siunnersuusiornissaminnut aningaasaliiffigineqarsimapput.
Assi © : KNR/Arkiv
januaarip 09-at 2015 13:01

Taama ittumik suliaqarnerup ilisimalikkat paasissutissallu immikkut programmiliutissavaat, nunat Atlantikup Avaannaaniittut aalisarnerup, pinngortitap avatangiisillu qanoq atornissaannut sakkussaqarniassammata.

Maannakkorpiaq Norge kisiartaalluni immap naqqa pilersaarusiukkamik nakkutigisarpaa. Nunatta imartaata naqqa uumassusillillu tassunga attuumassuteqartut siusinnerusukkut pilersaarusiukkamik ilisimatuussutsikkulluunniit nalunaarsorneqarsimanngillat.

Taamaattumik suli ajornakusoorpoq nalilersussallugu Nunatta imartaani kilisaasersornerup oliamillu ujaasinerit qanoq sunniuteqarsimanersut. Tamannali maanna iluuseqarfiginiarneqalerpoq.

- Uumassusillit immap naqqaniittut aalisakkanut, timmissanut naluutilinnut miluumasunullu inuussutissatut pingaarutilittut isigineqarput. Aammattaaq immap naqqa imaani uumassusilippassuarnut allanut nerisareqatigiinnut pingaaruteqartut  ilisimatusarluarsimasoq Pinngortitaleriffimmeersoq Martin E. Blicher nassuiaavoq.

Suliniut aalisarnermik suliaqartut peqatigalugit ingerlanneqalereerpoq MSC-mik meqqilersuinissap atuutsinneqalerneranut atasumik paasissutissanik katersinermi. Meqqilersuinermut atasumik Nunatta piumasaqaatit arlallit naammassiniartussaavai, soorlu kinguppannut kingusinnerusukkullu aalisakkanut assigiinngitsunut qalerualinnullu tunngasumik; tamakkununngalu atasunik suli piumasaqaatit allat Nunatta aamma naammassiniartussaassavai - taakkununnga ilaalluni immap naqqata uumassusillillu tasamaniittut ilisimatuussutsikkut uppernarsaatitalimmik nalunaarsorneqarnissaat.