Sinerissap qanittuani raajarniarneq oqallisigissavaat
Isumasioqatigiinnissamut aallaaviuvoq KNAPK-p Royal Greenlandillu peqatigiillutik 2007-imi novembarimi nalunaarusiarititaat qulequtaqartoq ”Sinerissap qanittuani raajarniarneq – raajarniarnerup aaqqissuussaaneranut tunngatillugu pilersaarutit”.
Ataatsimiinnissami sinerissap qanittuani raajarniarnermut attuumassutillit nalunaarutip imarisai pillugit oqallitsinneqarnissaat siunertaavoq.
Isumasioqatigiinnissami peqataasussat 50-it sinerissap qanittuani raajarniarnermi ajornartorsiutaasut, soorlu angallatit angissusaat, nunamut tunisisussaatitaanermut piumasaqaatit kiisalu sinerissap qanittuani raajarniarnermi siunissami unammilligassat eqqartussavaat.
Naalakkersuisoqarfimmit erseqqissarusunneqarpoq, isumasioqatigiinnermi raajat akii imaluunniit tunisinermi malittarisassat eqqartorneqassanngimmata, pissutsimmi taakkununnga tunngassuteqartut KNAPK-p tunisassiortullu akornanni isumaqatigiissutigineqartussaammata, Aalisarnermut Naalakkersuisoqarfik erseqqissaavoq.