Sinerissamik nakkutilliissut nutaaq tikippoq

Sinerissamik nakkutilliissut piareersarneqarpoq misissoqqissaarneqarlunilu, taamaalilluni Kangilinnguani Sakkutooqarfiup alapernaarsuutaatut atuutilersinnaaniassammat.

Knud Rasmussen apriili tamakkerlugu misileeraataasumik angalatinneqassaaq, ilaatigut immami sikulimmi angalasinnaanera misilerarneqassalluni.

- Taamaattorli immami pinartumik maannakkut pisoqaraluarpat, Knud Rasmussen ujaaseqataasinnaalersoq, Tim Jensen Kangilinnguani sakkutooqarfimmeersoq Radioavisimut oqarpoq.

Sinerissamik nakkutilliissut nutaaq, sinerissami nakkutilliissutitoqqanut, ukiuni 32-ni nakkutilliissutitut atuutereersunut taartaasussanut siullersaavoq. Sinerissamik nakkutilliissut Agdleq atorneqarunnaareerpoq piffissamilu aggersumi Tulugaq Agpalu aamma atorneqarunnaassapput.

Knud Rasmussen misileraataasumik angalatinneqareeruni Danmarkimut utissaaq, atortorissaarutissaalu kingulliit ikkussuunneqassallutik. Tamatuma kingorna aggustiulerpat nakkutilliissutitut atorneqalissaaq. Sinerissamik nakkutilliissutit nutaat pisoqqanit tallimariaammik anginerupput marloriaatingajammillu sukkanerullutik. Qulimiguulinnut mittarfeqarput sukkasuuliamillu mikinerusumik annanniuteqarlutik. Sinerissamik nakkutilliissut nutaaq apriilip sisamaanniit arfineq aappaanut Nuummi takuniarneqarsinnaassaaq.