Sinerissami unnuk kulturisiornerit iluatsilluartut
Sisimiuni suliffeqarfiit anginerit ilaat marluk siullermeerlutik Unnuk Kulturisiornermi takuniarneqarsinnaasimapput. Nukissiorfiit KNI-lu inuppassuarnit pulaarneqarsimapput, iserniartullu amerlammata utaqqisoqartariaqarsimalluni, Sisimiut kommuniani kulturimut ingerlatsivimmi pisortaq Agnes Johnsen radioaviisimut oqaluttuarpoq. Sisimiuni nipilersornermut atuarfimmi atuartut unnuk kulturisiortunut tusanaartitsisimallutik.
Ilulissani kulturip illuani Sermermiuni imigassallerfiunngitsumik qititsineqarpoq, qitigiaasullu amerlasimangaarmata, unnuap qeqqanut Sermermiut matusussaagaluartoq unnuaq marlunut aatsaat matusimasoq, Sermermiut pisortaa Simon Løvstrøm oqaluttuarpoq.
Qaqortumi unnuk kulturisiornermi Politeeqarfik pulaarneqarsinnaasimavoq, tassani aallaasit illuinarsuutillu takutinneqarlutik taamatullu annanniutit saqqummersinneqarlutik, Qaqortup politeeqarfiani pisortaq Jack Nathansen oqaluttuarnera malillugu politeeqarfik pilersaarutaasumit sivisunersumik ammatinneqarsimavoq, takuniaasut tamakkerlugit isertissinnaaniarlugit.
Air Greenlandip Nuummi timmisartunik inissiissarfia unnuk kulturisiortunit soqutigineqarnerpaasimavoq, tassani timmisartut qanimut takuniarneqarsinnaallutik.
