Sinerissami eqqartuussinerit ilaat pineqaatissiinermik kinguneqarput
Qeqertarsuarmi januaari naasoq toqutseriarneq siulliuteriartigu.
Angut arfininngornermi januaarip ulluisa 31-anni aapparmi qungasia savimmik kapisimanerarlugu nammineq politiinut siarnutigaa. Qujanartumilli qungasia kipisimanngilaa. Arnaq qungatsimigut kilerujussuarsimavoq, napparsimmavimmilu ulluni marlussunni uninngariarluni angerlarsinnaasimalluni. Angulli savilersortoq februaarip 20-ata tungaanut tigummigallarneqarpoq, tallimanngormallu eqqartuussivimmut sassartinneqarami, aapparminik toqutseriarsimasutut ukiuni pingasuni Pinerluuteqarsimasunut inissiisarfimmiittussanngortitaavoq.
Angut alla Tasiilami januaarip ulluisa 18-iannili toqutseriarsimasutut tigummigallarneqalersoq eqqartuussivimmut aamma sassartitaavoq. Taamani angutip 31-nik ukiullip arnaq qiutinik taliagut tunuagullu kapivaa, taamaaliorneranilu angut peersitsiniaraluartoq timimigut kimillatsiterneqarpoq.
Angut 31-nik ukiulik pinerluttaalisitsinermut inatsimmi immikkoortunik marlunnik unioqqutitsisimasutut sapaatip-akunnera kingulleq pineqaatissinneqarpoq, ukiuni marlunni affarmilu pinerluuteqarsimasunut inissiisarfimmittussanngortitaalluni.
Paamiuni angut 32-nik ukiulik nuliaminut 36-nik ukiulimmut annersaasimasutut januaarip naanerani tigusarineqartoq, sapaatip-akunnerinilu sisamani tigummigallarneqartoq eqqartuussivimmut februaarip ingerlanerani sassartinneqarami qaammatini qulini pineqaatissinneqarsimasunut inissiisarfimmiittussanngortitaavoq. Pineqaatissinneqarnini akuerinngilaa, taamaattumillu Nunatta Eqqartuussivianut ingerlateqqillugu.
Paamiuni angut alla 22-nik ukiulik pinerluuteqartarsimanernut 19-inut, ilaatigut tillinniarnernut qunusaarisarnernullu atatillugu januaarimili tigummigallagaasoq qaammatini qulini aamma pineqaatissinneqarpoq. Pineqaatissinneqarninili aamma taassuma Nunatta Eqqartuussivianut ingerlateqqippaa.
Paamiut Eqqartuussivianut sassartitsinerit qaqugu Nunatta Eqqartussiviani suliarineqassanersut Paamiuni politeeqarfiup pisortarigallagaata, Rita Manja Geislerip, oqaatigineqarsinnaanngikkallarnerarpaa.
