Sineriassortut ilaat raajartassaaruttut
Raajarniut ”Katri” 400 tonsit missaannik ukiumut pisassaqartarpoq, taakkualu maanna tamakkereerpai. Raajartassanik aalisartunit allanit pisiniartaraluarput, maannamulli iluatsinnagu, naak siorna raajartasssanik pisisarnermikkut 900 tonsit angullugit raajaraluarlutik.
- Politikerit aaqqiinngippata raaajarniat ikiliartulissaapput. Aamma inuiaqatigiinnut akisussaqaaq. 6000 tonsit siorna pisarinngitsuukkat inuiaqatigiinnut aningaasarpassuarnik naleqarput, Niels Olsvig, Katri-mi ingerlatseqataasoq oqarpoq.
KNAPK-ip siulittasua Peter Olsen uppernarsaavoq, sinerissap qanittuani raajartassat nungunneqanngitsoortartut. Kisianni assigiingitsunik nassuiaatissaqarnerarpaa:
- Maskiinaajartoqartarpoq, aamma anginerusumik aalisariutitaarniarlutik raajartassanik katersisarput. Aamma tunisassiorfinni pissutsit peequtaasarput, Peter Olsen oqarpoq.
KNAPK-p taarsiullugu inatsisit allanngortinenqarnissaa maanna sulissutigaa, sinerissamut qanittumi aalisartut avataasiortut raajartassaasa ilaannik tunineqartalerumallutik. Siulittaasorlu naapertorlugu, Inatsisartut aalisarnermut ataatsimiisitaliaat taanna pillugu saaffigiuminarpoq.
Aalisarnermut, Piniarnermut Nunalerinermullu Aqutsisoqarfimmut paasiniarsimagaluarput, raajat tonsit qassit pisaringitsoorneqartarnersut, ullup qeqqatali siorna iluatsinnagu.
