Simon Lynge nuannaarsuaarpoq

Saqqummersitassaa, The Absence of Fear, juunimi naammassissangatinneqartoq, saqqummersitsisarfimmit arlaannaanulluunniit attuumassuteqanngitsumit saqqummersinneqassaaq, taamaammat Simon Lynge saqqummersitsinissani nammineq aningaasalersortussaasimavaa. Nittartakkami Kickstarterimi katersuiniarpoq. Nuannarinnittai tassuuna aningaasanik tunissuteqarnissaminnut periarfissaqarput, taarsiullugulu Simon Lyngemit tunissutinik tunineqassallutik.

CD-it atsiornertallit, saqqummersitap nutaap digitalinngorlugu aanera kiisalu Simon Lyngep tuttup nassuinik nooqusiai nuannarineqarluarsimapput. Aningaasaliisut sisamat aamma Simon Lynge erinarsuusiaanik pisisimapput, taakkulu erinarsuutip taagutissaa sunillu sammisaqarfiunissaa aalajangersinnaasimallugu.

Simon Lyngep 202.000 koruunit katersorpai. Anguniagaa tassaasimavoq 35.000 dollarsit, tassalu 200.000 koruunit missaat. Kickstarter ima atugassiaavoq, ulloq katersuiffiup naaffissaa nallertinnagu aningaasat katersugassat tamakkinngikkaanni pissarsiarineqarsinnaanatik. Simon Lyngellu anguniakkani piffissaliussaq sioqqullugu nalunaaquttap akunneri 24-it iluanni angusimavaa.