Simon Lynge kbh.-imi tusarnaartitsivoq

Københavnimi Illorsuaq Atlantikumi nipilersortartoq taalliortorlu Simon Lynge unnummut tusarnaartitsissaaq. Affarmik kalaallip, 26-inik ukiullip, Los Angelesimi najugallip nuuteeqqatut saqqummersitassamini taalliani ilaatigut tusarnaartitsissutigissavai.

- Inuuninni misigisimasakka, asanninneq assigiinngitsullu taalliarisarpakka, Simon Lynge oqarpoq.

Taama oqarmat aperaarput Los Angelesimi najugaqarluni, angajoqqaavi kalaaliullutillu danskiusut taalliortarneranut sunniuteqarsimanersut, ima akivoq:

- Aap, sunniuteqarsimaqaaq. Nunat assigiinngilluinnartut kulturii tunuliaqutaralugit perorsarneqarnera uannut sunniuteqangaatsiarpoq. Nunani taakkunani kulturit assigiinngitsut paasisarpakka pisullu assigiinngitsut malinnaaffigisarlugit. Tamanna tunissutitut isigisarpara, Simon Lynge oqarpoq.

Taanna apereqqipparput sooq tuluttut taalliortarnersoq, ima akivoq:

- Tuluttut taalliat tusarnaarnerusarpakka. Tuluttut taalliortoqarnerusamat misigissutsikka tuluttut oqaasertalersorlugit uannut oqinnerusarpoq. Kalaallisut danskisullu erinarsuusiussagaluaruma ajornakusoortinnerussagaluarpara, Simon Lynge naggasiivoq.