Sillimaniarnermik ilinniartitsisinnaapput
Naalagaaffiup Timmisartuussinermik Nakkutilliisoqarfianit akuerisaasumik, nunatsinni Mittarfeqarfinni qitiusumik ilinniartitsinerup ataani, Kangerlussuarmi Narsarsuarmilu mittarfinni isumannaallisaanermik suliaqartunik ilinniartitsisoqartarpoq.
- Bornholmimi mittarfik suleqatigalugu, danskinik savalimmiormiunillu ilinniartitsisinnaanerput timitalerneqarsinnaalerpoq, taama oqarpoq nunatsinni Mittarfeqarfinni qitiusumik ilinniartitsinermi pisortaq, Jens Christian Nielsen.
Taanna oqarpoq, soorunami piumasaqaatit atuuttut malillugit neqerooruteqarsinnaallutik. Neqeroorutip iluaniipput ilaasut pisataannik misissuinerit. Ilaasut nassataannik qinnguartaatit atorlugit misissuinerit aammalu Mittarfeqarfinni malittarisassanik atuuttunik tamanik ilisimannilersitsineq.
Bornholmimi Mittarfiup qanoq soqutiginnitsigineranik Jens Christian Nielsen aperineqarami oqarpoq, suleqatiginnilernissamik neqeroorfigitinnertik soqutigisorujussuugaat aammalu timitaliinissamut soqutiginnilluartut. Jens Christian Nielsen–ip erseqqissarpaa, ukiuni aggersuni malittarisassat ikinnerulernavianngimmata uninnatik malinnaasariaqarlutik. Aamma tupinnanngitsumik Bornholmimi Mittarfik peqataajumalluni tunuarsimaanngitsuusoq unnerpaa, tamannalu tupinnartoqanngimmat erseqqissaatigalugu.
Jens Christian Nielsen-ip, nunatsinni Mittarfeqarfiit qitiusumik ilinniarfiata pisortaata aamma oqaatigaa, ilinniartitsinerminni Kalaallit Nunaani atortakkatik danskit malittarisassaannut naleqqussareerunikkit, Danmarkimi ilinniartitsinertik ukiaru aallartissinnaalissagitsik.
