Silap pissussaa pillugu Ilisimatusarfissaq isumaqatigiissutigaat
”Silaannaap pissusaata allanngoriartornera sillimaffigineqassappat pisariaqarpoq ilisimatusarnerup nukittorsarnissaa ”, ilisimatusarnermut ministeri Helge Sander isumaqatigiissuteqartoqarnermi oqarpoq.
Ilutigisaanik silaap pissusaanik ilisimatusarfik aappaagu Naalagaaffiit Peqatigiit Københavnimi silaannaap pissusaa pillugu ataatsimeersuartitsinissaanut imaannaanngitsumik toqqammaviussaaq Helge Sander oqarpoq.
Silap pissusaanik ilisimatusarfik Pinngortitaleriffimmut Ilisimatusarfimmullu atatillugu inissinneqassaaq. Pisortaq, professori aamma ilisimatusarfinni ilisimatuut ikinnerusut Kalaallit Nunaanneersut Danmarkimeersut nunanilu allaneersut atorfinitsinneqassapput. Suliassat pingaarnersaat tassaassaaq silaannaap pissusaata allanngoriartornerata allaaserinissaa, taamatullu nalilissallugu issittumi inuiaqatigiinnut pinngortitamullu qanoq
sunniuteqassanersoq.
Danskit ilisimatusarnermut naalakkersuisuiata Helge Sanderip Naalakkersuisunullu ilaasortap Tommy Marøp isumaqatigiissutigaat aningaasatigut pilersaarusiornikkullu pisariaqartitat ukioq manna inissinneqarumaartut, silap pissusaa pillugu ilisimatusarfik aappaagumiit atulersinnaaniassammat.
