Silap pissusiata allanngoriartornerata Qaanaamut eqqaanullu sunniutai ilisimatuut misissuleraat

Silap pissusiata allanngoriartornerata nunarsuarmi inuiaqatigiinnut assigiinngitsorpassuarnut ukiup ilaatigut piniarnermik aalisarnermillu inuuniuteqartunut sunniutaata paasisaqarfigilluarnerunissaanik ilisimatusarnissaq siunertaqarpoq. Peqatigitillugu ilisimatusariaatsinit tamaginneersut, soorlu itsarnisarsiuut, uumassusilinnik ilimatuut aamma inuup inuiaqatigiillu pissusiinik ilisimatusartut suleqatigiinnissaannut periaatsinik nutaanik ineriartortitsinissaq aamma neriuutigineqarpoq.

Nunatta sermersua ukiuni makkunani sukkasuupilussuarmik aakkiartorpoq. Tamatumalu malitsigisaanik avannaani pinngortitami ataqatigiinnerit allanngoriartupiloorfiupput Avanersuarmiunullu 700-t missaanniittunut inuuniarnikkut nutaarluinnarnik atugassaqartitsilerlutik.

- Sikusarnerata annikilliartortup aalaakkaajunnaartullu kingunerisaanik piniartut imartami Kalaallit Nunaata Canadallu akornanni ileqquusumik piniariartarfigisaat tikikkuminaallivoq, Avanersuarmilu inuiaqatigiinnut puisinik, arfernik aalisakkanillu pilersuinermut ajornartorsiortitsilersimalluni. Tamatuma malitsigisaanik nunaqarfiit inuerukkiartorput nunallu immikkoortuani tassani najugaqartut siunissaat nalorninarsilluni. Silap pissusiatali allanngoriartornera aamma siunissaq ungasinnerusoq eqqarsaatigalugu periarfissanik nutaanik nassataqassaaq, soorlu assersuutigalugit imaatigut aqqutit nutaat aalisarnermillu inuussutissarsiorneq akilersinnaanerusoq, Kirsten Hastrup, Københavns Universitetimi inuup inuiaqatigiillu pissusiinik ilisimatusarnermi professoriusoq suliniummillu aqutsisuusoq taama oqarpoq.

Ilisimatusariaatsinit tamaginneersut suliniutaat Københavns Universitetip inuup inuiaqatigiillu pissusiinik ilisimatusarfianit aqunneqarpoq Danmarkimilu Katersugaasivissuarmi ilisimatusarnermut professori Bjarne Grønnow aamma Aarhus Universitetimi Biosciencemi ilisimatusarnermut pisortaq Anders Mosbech qanittumik suleqatigineqarlutik.

Suliniut Carlsbergfondimit, Veluxip Villumillu aningaasaateqarfiinit 18,9 mio. koruuninik aningaasaliiffigineqarsimavoq. Suliniut 2017-ip tungaanut ingerlanneqartussaq aasaru aallartinneqassaaq, ilisimatuullu aqqaneq-marluk suliartorlutik Qaanaaliassallutik.