Isumasiuineq: Silap pissusiata allanngoriartornera nunarsuarmi ulorianartorsiortitsinerpaavoq

Pew Research Groupip nunarsuaq tamakkerlugu inunnik isumasiuinerata tamanna takutippaa.

Nunat 26-t akornanni 13-it silap pissusiata allanngoriartornerata kingunerisai nunarsuarmi ulorianarnersaattut nalilerpaat.

Peqqarniisaarniat Islamisk Statimeersut nunani arfineq-pingasuni ulorianarnersaattut nalilerneqarput, internetilu aqqutigalugu saassussinerit ulorianarnerpaatut nunani sisamani nalilerneqarlutik. Nunap ataatsip, tasa Polenip, Rusland nunarsuarmi ulorianarnerpaatut nalilerpaa.

AAMMA ATUARUK Silap pissusiata allanngoriartornera innuttaasut ernumanartoqartikkaat

Inuit 27.600-nit amerlanerusut, siorna maajimit aggustip tungaanut isumasiorneqarsimapput, isumasiuinerullu aamma takutippaa USA-p pissaaneqarnera sunniuteqarsinnaassusialu Donald Trumpip præsidentiunerata nalaani annertusiartuinnalersimasutut nalilerneqartoq.

Barack Obama præsidentiummat USA-p pissaaneqarnera isumasiorneqartut 25 procentiisa ernummatigaat, Trumpillu præsidentiunerata nalaani tamanna maanna 45 procentinngorsimalluni.

Islamisk Statilli ulorianarnerpaatut nunani arlalinni nalilerneqarnera ataatsimut isigalugu annikilliartortoq isumasiuinerup aamma takutippaa. Pingaartumik USA-mi, Japanimi, Spaniami Israelimilu annikilliartortoq, maanna isumasiuinerup kingullermik isumasiuisoqarneranut naleqqiullugu takutippaa.

/ritzau/Reuters