Silap pissusiata akiorniarneqarnissaa partiinit tapersersorneqarpoq
- Nunat pisussaaffiliinernik naapitsisinnaasut isumaqatigiissutigineqartunik naammassinnissinnaanissaat pisariaqartinneqarpoq, Kalaallit Nunaallu matumani aamma peqataasinnaalluni, John Nordbo, Pinngortitaq pillugu nunarsuaq tamakkerlugu suliniaqatigiiffimmeersoq ullumi ullaap tungaani taama ilaatigut oqarpoq.
Nunatta nukissiuutinik ataavartunik atuingaatsiarnera, John Nordbop ilisimavaa, innuttaasulli amerlassusiinut naleqqiullugu CO2-mik suli aniatitsisoqangaatsiarpallaarnerarlugu. Nunatta isorartunerujussua soorunami eqqarsaatigineqartariaqartoq, taassuma aamma oqaatigaa, aniatsitsinerusinnaanermulli tunngasut Naalagaaffeqatigiinnerup iluani isumaqatigiinniutigineqarsinnaanerarlugit.
Anguniakkanik ataatsimoorussanik isumaqatigiissuteqartoqanngilaq, Nunattali nunat tamalaat isumaqatigiissutaannut peqataasariaqannginnerannut isumaqatigiissusiortoqarnikuuvoq. Isumaqatigiisut taanna Jens B. Frederiksenip ukioq Naalakkersuinermi nalaani Danmarkip silap pissusaanut ministeriallu Qatarimi atsiorpaat. Isumaqatigiissullu taanna Inatsisartuni ullumi akuersissutigineqartussaasoq, Jens B. Frederiksenip, Demokraatineersup, oqaatigaa.
- CO2-mik aniatitsisinnaanermut atatillugu Nunatta Danmarkimut nunanullu allanut EU-mut ilaasortaasunut allanut naleqqiullugu immikkut inissisimanissaa isumaqatigiissutigaarput, Jens B. Frederiksen oqarpoq.
Gassinik silaannarmik kissakkiartortitsisartunik mingutsitsinerminik Nunarput 2008-p 2013-illu akornanni 8 procentinik annikillisitsinissaminut imminut pisussaaffilerpoq, isumaqatigiissullu Nunatsinnut akisussaaffiliisoq, Jens B. Frederiksenip oqaatigaa, imatullu nangilluni:
- CO2-mik sapinngisamik annikitsumik aniatitsissaagut, kisianni isumaga naapertorlugu 1990-ikkunnili ilungersorluta Nunatsinni erngup nukissiuuteqarneq ingerlannikuuarput, nukissiornerullu 60 procentia sinnerlugu erngup nukinganit pisuulluni. Tamanna puigorneqassanngilaq. Immaqa Norgep taamaallaat nallersinnaavaatigut. Europami nunat allat tassuunatigut nallersinnaanngilaatigut, taamaammat tamanna tulluusimaarutigissavarput, Demokraatit siulittaasuat Jens B. Frederiksen oqarpoq.
Silap pissusiata allanngoriartornerata akiorniarneqarnissaani Nunatta immikkut inissisimanissaanut siunnersuut, Pinngortitamut Avatangiisinillu Naalakkersuisup Miiti Lyngep Inatsisartuni ullumi saqqummiuppaa. Taanna ima nassuiaavoq:
- Tassuunga tunngatillugu oqaannassaanga inukitsuarakasiugatta, nunarujussuullutalu. Suliffissuaqarfinnillu ineriartortitseqqinnissarput, suliffissuaqarfinnik aallartitsinissarput taanna aamma siunertaammat. Tassa, nuna namminiileriartortoq, nammineq naalagaaffinngoriartortoq tassani aamma eqqarsaatigineqarpoq, imminut aningaasalersorsinnaaneq tassani aamma angorusukkatsigu, Ineqarnermut, Pinngortitamut Avatangiinullu Naalakkersuisoq Miiti Lynge, oqarpoq.
