Silap pissusianik ilinniartitsineq nutaaq
![](/sites/default/files/styles/image_934x467/public/article_images/nuuk-naturinstituttet.jpg?itok=_0GyO-Su)
Suliniut "Climate change teaching in Greenland"-imik taaguuserneqarsimavoq, tassa silap pissusia pillugu Kalaallit Nunaanni ilinniartitsineq pillugu suliniut aallartisarneqassalluni. Inuusuttut pinngortitamik ilisimatusarnermut soqutiginninnerulernissaat neriuutigineqarpoq. Pinngortitaleriffik KNR-imut taama ilaatigut allappoq.
Silap pissusianik oktobarimi ullormi ataatsimi immikkut sammisaqarneq, ullunik sisamanik nanginneqarumaarpoq, ilinniarnertuunngorniat silaannarmi atmosfære-imi pisut pillugit, nunami pissutsit, silap pissusia pinngortitamilu ataqatigiiaat pillugit immikkut aamma sammisaqartinneqassallutik.
Pinngortitaleriffik, Aarhusip Universitetia, Finlandimilu University of Helsinki suliniummik aaqqissuisuupput, ilinniartitsisullu taakkunaneersut aamma suleqatigineqarsinnaassallutik.
Issittumut sunniuteqartorujussuuvoq
Silap pissusia Issittumut sunniuteqartorujussuuvoq. Nunap inoqqaavisa piniarnikkut periarfissaat ukiualunnguit ingerlanerinnaanni allanngoriartupiloorsimapput. Nappaatit inooriaatsimit aallaaveqartut nutaat siumorneqartalersimapput, assersuutigalugulu Nunatsinni aatsitassarsiorniat uuliasiorniallu ukiut kingulliit ingerlaneranni amerliartorsimallutik.
Ajornartorsiutit nutaat tamakku aaqqiiviginiaraanni ilisimasaqarluarnissaq pisariaqarpoq. Ilisimasat tamakku Nunatsinnit katersorneqarlutillu aaqqissugaanerusumik paarineqarnissaat sulissutigineqartariaqarpoq, Issittoq pillugu ilisimalikkat kinguaassatsinnit atorluarneqarsinnaanissaat taamaaliornikkut qulakkeerneqarsinnaaniassammata, Pinngortitaleriffik allappoq.
Inuusuttut pinngortitamik ilisimatusarnermik soqutigisallit taamaammat maanna anguniarneqalerput, ilisimalikkat siunissami atorluarneqarnissaat neriuutigineqarluni.