Silap pissusia pillugu Nuummi akerliussutsimik takutsisut: Ajornartoorneq unitsilli!

Silap pissusia pillugu nunarsuaq tamakkerlugu ullumikkut aamma akerliussutsineq takutitsisoqarpoq. Nuummi ilinniarnertuunngorniarfimmeersut aamma peqataapput.

"Silap pissusia pillugu atuarujumajunnaarneq" qulequtaralugu silap pissusia pillugu akerliussutsimik takutitsinerit nunani 116-ini ullumikkut ingerlanneqarput.

Nuummi GUX-imi ilinniarnertuunngorniat aamma peqataapput. Taakku Inatsisartoqarfiup saavani katersuupput, politikkillu suugaluartulluunniit silap pissusianut attuumassuteqarnera erseqqissaatigererusuppaat. 
Peqataasut ilagaat 18-inik ukiulik Iluuna Sørensen. 

- Akerliunitsinnik takutitsinissarput pingaaruteqarpoq. Silap pissusia ajornartoorutigineqarpoq, nunarsuarmi tamarmi taama pisoqarpoq - uagullu unitsinniartussaavarput, KNR-imut taama oqarpoq.

- Nunatsinni politikerinit silap pissusiata pimoorunneqarnissaa allanngortitsisoqartariaqarneratalu pingaarnersiorneqarnissaa neriuutigaarput. Ilinniarnertuunngorniarfimmi piujuaannartitsinissaq pillugu suliaqarpugut, maanilu sutigut iliuuseqarsinnaanerluta eqqarsaatigilluarsimallutigu. Plastikkimik atuinnginnerunissaq eqqartorparput. Neriuppugullu akerliussutsimik takutitsinitsigut siunissatsinnut allanngueqataasinnaassalluta, Iluuna Sørensen oqarpoq.

Suliniaqatigiiffik Fridays for Future, Sverigemiumit Greta Thunbergimit pilersinneqartoq, aaqqissuisuuvoq. 

Nunatsinnilu silap pissusia pillugu suliniuteqartut innuttaasunut tamanut kaammattuuteqarput:

- Kikkunnut tamanut - politikerinut, suliniaqatigiiffinnut innuttaasunullu - kaammattuutigissavarput isumaqatigiinngissutigineqartut puigorlugit siunissaq minguinnerusoq pillugu aaqqissuussineq pingaarutilik tapersersoqqullugu, nunarsuatsinni ajornartoornerit sakkortunersaat suleqatigiinnitsigut aatsaat qaangersinnaagatsigu. 

Naalagaaffeqatigiinni illoqarfinni 20-nit amerlanerusuni atuartut innuttaasullu allat akerliussutsimik takutitsipput.

Nunani assigiinngitsuni 116-ini sumiiffinni 1524-ni silap pissusia pillugu ullumikkut akerliussutsimik takutitsinissat pilersaarutigineqarput

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat