Silap pissusia pillugu ataatsimeersuarneq Polenimi aallartippoq
Københavnimi aappaagu ataatsimeersuarnissap tungaanut suliassanik tulleriissaarinissaq ataatsimeersuarnermi siunertat pingaarnersaraat.
Nunani ineriartortuni teknologimik nutaamik atuilernissamut aningaasassarsiornissaq, kiattut orpippassuisa nungukkiartuinnarnerinik akiuineq kiisalu silamik pissuteqartumik aseruerujussuartoqalinnginnerani, CO2-mik aniatitsivallaarnerup killilernissaanut nunat ineriartortut nunallu inerissimasut tamarmik suleqataanissaannik isumaqatigiissuteqarsinnaanissaq Polenimi ataatsimiinnermi qulequtaassapput.
Danskit silap pissussaanut nukissiutinullu ministeriat Connie Hedegaard ataatsimeersuarnermi peqataassaaq, pingaarnertut suliarissallugu USA-miit peqataasunik qanimut suleqatissarsiornissaq.
Tassami Berlingske Tidende allappoq, USA-p præsidentissaa Barack Obama oqarsimasoq, silap pissusaata allanngoriartornera suliassamini pingaarnernut inissinniarlugu, USA-lu suliami tamatumani siuttuussasoq.