Silap pissusaata qimaatitai
1823-mi umiarsuup naalagaata Clavering-ip naggueqatigiit Inuit amerlanngitsut Illoqqoortoormiut avannaani kangerliumanermi Dødemandsbugtimik taaneqartartumi naammattoorpai. Ullut arlallit ingerlaneranni inunnut taakkununnga, takornartanut nujuakujuttutut taaneqartunut attaveqalerput, taamatulli attaveqarneq tassanngaannartumik kipitineqarpoq, taakkua ilaata aallaammik igitsinneqarnerata kingornagut. Naggueqatigiinnguit Inuit taakkua aallaat annilaarutigalugulu ersigisorujussuuaat, Claveringilu aqaguani takkuteqqikkaluarmat naggueqatigiit qimagutereersimapput.
Taamatut naapeqatigiinneq Tunup Avannaani nunaqavissut ilisimasassarsiortullu siullermeerlutik kingullermeerlutillu naapinneraat. Taamanimiilli tamaani nunaqartut 1800-kkunniilli sooq Tunup Avannaa qimassimaneraat eqqumiigineqartarpoq.
Assaalluni misissuinerit ersersippaat Tunup Avannaa Thulekulturimik taaneqartartumit ukiuni 400-ni inoqarluarsimagaluartoq. Claveringikkut inooqatigiinnik ataasiinnarnik naammattuuinerisa ersersippaa, piffissami tamatumani tamaani najugallit ikililluinnareersimasut.
Ilisimatusartut ilimagaat 1800-kkunni silap pissusaata allanngornera pissutigalugu naggueqatigiit Inuit Thulekulturimeersut Tunup Avannaaniit qimagussimasut.
