Silap pissusaata allanngornera isiginnaagassiaraat
Pisimasuinnik tunngavilinnik isiginnaagassiorneq, Londonimi mutiuvoq, ullunilu makkunani silap pissusaata allanngornera sammineqartoq, aviisimi Kristeligt Dagbladimi allaaserineqarpoq.
National Theatre-mi ”Greenland”, isiginnaagassiortartunit sisamanit ukiup affaata ingerlanerani piareersarneqarsimasoq takuneqarsinnaavoq. "Greenland"-imik isiginnaagassiortut silap pissusaanik ilisimatuut, illersuiniat atorfilittallu oqaloqatigisarlugit inuttalersuipput, tassaasunik: inuusuttoq silap pissusaanik sorsuutiginnittoq, biologi appanik ukiorpassuarni kisitsisarsimasoq aamma nunat tamalaat aallartitaat ataatsimeersuaraangata ikiortaasartoq kiisalu nannut marluk.
Isiginnaartitsisarfik misileraaffiunerusoq Royal Court Theatre ajoqersuinerluttoq pillugu "The Heretic" isiginnaagassiamik takutitsivoq, tassani silap pissusaa pillugu ilisimatooq ilisimatooqatimi paasisatik tunngavigalugit inerniliussaannit, allaalluinnartumik inerniliussisoq pillugu isiginnaagassiaq takutinneqarluni.
Isiginnaartitsisarfimmi allami The Tricycle-imi "Water" (Imeq), assilissat, nipit allallu atortorissaarutit atorlugit isiginnaagassiaq takuneqarsinnaavoq. Isiginnaagassiami silap pissusaata allanngornerata Canadamut sunniutai, silap pissusaa pillugu iliuusissat pillugit Tysklandimi isumaqatiginninniarnerit aamma angut aqqartartoq, immap naqqani qaarusummut Mexicomiittumut, paasisassarsiortoq paarlakaattuarput.
Isiginnaartitsissusiat pingasut taakku naliliisartut nersualaarpallaanngilaat, "Water"-ili paasiuminarnerpaanerarneqartoq, Kristeligt Dagblad allappoq.
