Silap pissusaata allanngoriartornera periarfissiilluassaaq

Sullualuk aasat tamaasa maanna angalaffigineqarsinnaanngormat, umiarsuit atorlugit niuernissamut periarfissat maanna ajornannginnerulissapput, pingaartumik ujarassiornermut tunngassutillit.

Ataqatigiinnerup aatsitassarsiornerullu ukiuni 25-ni tulliuttuni siuarsarnissaanut Nordvest-territoria Nunavummilu atsitassarsiorneq pillugu kattuffik, The Nunavut Chamber of Mining, pilersaarummik nutaamik saqqummiusseqqammerput.

Qaarusuit nutaat 30-t, territoriani taakkunani marlunni sumiiffinni assigiinngitsuniittussat, pilersinneqassasut nalunaarusiami siunnersuutigineqarpoq. Pilersaarummi pingaarutilinnut ilaavoq, innaallagissamut nutaanik aqqusiornissaq - soorlu Iqalunniit qeqertaaluk Baffin aqqusaarlugu, Hudsonip kimmut sineriaa atuarlugu provinsit arlallit aqqusaariarlugit Issittup kippasissuani Victoria Island tikillugu. Innaallagissamut aqqutit taakku Canadami naalagaaffiup innaallagiaqarfianut attavilerneqassapput, innaallagissallu taamaalilluni akikinnerulernissaa naatsorsuutigineqarpoq. Atomip nukinga atorlugu nukissiorfinnik nutaanik sanaartornissaq aamma pilersaarutaavoq, tamannali suli inissivinngilaq, isuma akerleriiffiugallarmat, Baker Lake-p Rankin Inletillu eqqaanni uranisiorfiusussani taamaattuliornissaq eqqarsaataavoq.

Ukioq naallugu atorneqarsinnaasunik aqqusinniornissaq aamma siunnersuutinut ilaavoq, soorlu Hudsonip Kangerliumarnganiit sineriak kimmut atuarlugu Baker Lake-p tungaanut.

Tamakku tamarmik tassa siunnersuutaannaagallarput, Nordvest-Territoriamili Nunavummilu aatsitassarsiorneq pillugu kattuffiit isumaqarput siunnersuutit oqaluuserineqartariaqartut.