Silap pissusaata allanngoriartornera ernumagiunnaariartorpaat
Aviisip Berlingske Tidendep isumasiuisitsinerata ersersippaa, silap allannguutaanit sunniutaasinnaasunik aarleqquteqartut 2008-mut sanilliullugu ikinnerulersimasut. Silap pissusaata allanngoriartorneranut aarleqquteqartut taamani 75 procentiusimasut maanna 60 procentiinnanngorsimapput. Silap kiatsikkiartornera inunnit pilersinneqartoq aamma ikinnerusunit upperineqalertoq, pinngortitap nammineq pissusaatut isigineqarnerulerluni.
Eigil Kaasip, Københavnip universitetiani silasiornermut ilisimatuup, aarleqquteqartut ikinnerulernerat ima nassuiarpaa.
Patsisaasut ersarissut marluusinnaapput, aappaa tassaalluni ukioq manna Europap ilarujussuani issinnerujussua soorlu aamma Danmarkimi malugisarput, assersuutigalugu ullumi Bornholmimi nittaalluni silarluppoq. Aappaatut taasinnaavarput, silap pissusaa pillugu peqquserluuteqartoqarsimaneranik pasitsaassineq, tamannalu silap pissusaa pillugu ilisimatuut tamarmiusut, silap pissusaata allanngornerata ajornartorsiutaaneranik illersuisutut taaneqarsinnasut, Naalagaaffiit Peqatigiit silap pissusaa pillugu ataatsimiittartuisa oqaloqataanissaannut pinngitsoortitsiniarsarisut, akornanni pisimasuussangatinneqartoq patsisaasinnaavoq. Taamaaliortoqarneranimi qarasaasiakkut allakkat nassiunneqarsimasut eqqartorneqangaatsiarnikuusut, aarleqquteqartut ikilissutigisimannguatsiarpaat.
Danmarkimi taannarpiaq eqqartorneqarpallaarsimanngikkaluartoq, sooq taama sunniuteqarsinnaatiginersoq aperineqarami ima akivoq:
Nunani allani tusagassiorfinnik soorlu Tuluit Nunaannersunik amerikameersunillu nalinnaasut malugilluarsinnaavaat pineqartoq eqqartorneqartorujussuusoq. Paasissutissallu assigiinngitsorpassuit nutaat, nunat tamalaat akornanni silap pissusaa pillugu ataatsimiittartut isornartorsiorniarlugit suleqatigiinnit saqqummiuneqaqattaarput.
Silap pissusaata allanngoriartornera pillugu qallunaat aarleqquteqartut ikiliartornerat, qanoq ilisimatuutut nalilersinnaaneraa aperineqarami akivoq:
Tamanna pakatsinartoqalaarpoq, silammi pissusaata allanngoriartornera ajornartorsiutaavoq. Tamanna pillugu suleqatigiilluartoqartariaqarpoq siunissamimi annertuunik tunngaviusussanillu aalajangiisoqartussaavoq. Nunarsuarmi nukissiuuteqarnikkut atortuutit inissiallu ukiuni tullerni 50-ini allanngortiterneqartussaapput. Silap pissusaata allanngornera taamaallaat patsisaanani kisianni aamma taama iliortariaqavikkatta, nukinnik pilersitsisinnaanerput amigarpoq ullumituummi aaqqissuussineq atugarput attatiinnarsinnaassagutsigu. Illut siunissami oqorsarnerusariaqassavagut, biilillu orsussamik atuinikinnerusut pigilertariaqarlugit. Ikummatissat ullumikkut atortakkavut nunguppata, ullutsinni inooriaasitta attatiinnarnissaanut, nukissiuutit ataavartut naammattut piginngilavut. Tamakku silatusaartumik aningaasaliinitsigut maanna piviusunngortinngikkutsigit, siunissaq ungasinnerusoq eqqarsaatigalugu aningaasaliisoqartariaqarpoq.
