Silap pissusaata allanngoriartornera amerikamiut upperiuminaatsippaat

Silap pissusaa pillugu ataatsimeersuarnissami decembarimi pisussami inerniliunneqartussaq pissangalluta utaqqeruttoripput, silap pissusaata allanngoriartornera amerikamiut ilarparujussuannit suli upperiuminaatsinneqarpoq.
oktobarip 22-at 2009 15:04

Nunarsuatta kiatsissimanera pillugu uppernarsaatissanik peqartoqanngitsoq amerikamiut 40 procentii isumaqarput.

Avatangiisitta mingutsinneqarneranik aallaaveqartumik nunarsuup kiatsikkiartornera amerikamiut amerligaluttuinnartut ukiut pingasut qaanngiuttut ingerlaneranni upperiunnaarsimavaat. Isumasiuisitsisarfiup Pure Research Centerip ilisimaneqarluartup isumasiuinerata kingulliup tamanna takutippaa.

Nunarsuup kiatsinnera ilisimatuussutsikkut uppernarsaatissaqartinneqartoq amerikamiut 57 procentiinnaasa upperigaat oqaatigineqarpoq. Nunarsuup kiatsikkiartornera amerikamiut amerlanersaasa upperigaat siusinnersukkut misissuinerit takutissimagaluarpaat. Amerikamiut nalornissuteqarnerat ukioq manna qaffariaateqarnerpaasimavoq. Obamap naalakkersuisuisa USA-milu inatsisartut gassinik silaannarmik kissakkiartortitsisartunik aniatitsineq ukioq manna aqutarilerpaat. Gassinillu silaannarmik kissakkiartortitsisartunik aniatsitsinerup appartinneqarnissaa, apersorneqartut affaasa tapersersorpaat. Taamaakkaluartoq nunarsuup kissatsikkiartorneranik oqartarneq siusinnerusumut sanilliullugu amerikamiut ikiliartuinnartut upperaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq