Silap pissusaa pillugu nittartagaq pilersinniarpaat
Silap pissusaa pillugu Københavnimi decembarimi ataatsimeersuarnissap inernera neriulluarfigalugu suliniut Hopenhagen pilersinneqarpoq, tuluttut oqaaseq hope, neriunneq, tunuliaqutaalluni.
Allattoq Mads Lynge
juunip 24-at 2009 09:28
Suliniut Naalagaaffiit Peqatigiinnit aallartinneqarpoq, nunani tamalaani suliniuteqarnissaa siunertaalluni.
- Silap pissusaata allanngoriartornera maanna inuusunut kinguaassatsinnullu unammillernartoqassalluni. Københavnimi ataatsimiinnissaq tamatsinnut sunniuteqartussaavoq, isumaqatigiissuteqarnissarlu pingaaruteqarpoq, allannguutissallu takussaasut aamma piviusunngortinneqartariaqarlutik, Naalagaaffiit Peqatigiit qullersaata Ban Ki-moonip suliniutip aallartinneqarnerani oqaatigaa.
Pilerisaarusiortartut IAA suleqatigalugit nittarsaasoqarpoq, nittartagaq hopenhagen.org aqqutigalugu paasiniaasoqarsinnaalluni.
Suliniutip piviusunngortinneqarnissaa pillugu pilerisaarusiortartut najoqqutassanik saqqummiussaqarput.
