Silap pissusaa pillugu Københavnimi ataatsimiittoqarpoq

Silap pissusaanut tunngasut nutaat ataatsimeersuarnermi saqqummiunneqassapput.

Ukioq 2100-mi immap meterimik ataatsimik sinnerlugulunniit qaffaasimanissaa ilisimatuut eqqoriarpaat.

Taamaassappat inuit 600 millionit ajornartorsiulersinnaassapput. Qeqertaaqqani nunanilu pukkitsuni najugallit ajornartorsiulissapput.

Naalagaaffiit Peqatigiit silap pissusia pillugu ataatsimiittartoqatigiivisa eqqoriaanerannut tamanna ajorneruvoq.

Kyotomi isumaqatigiissutip taartissaa Københavnimi decembarip qaammataani ataatsimiissutigineqarpat, Naalagaaffiit Peqatigiit ataatsimiittartoqatigiivisa innersuussutaat tunngavigalugu nunat tamat isumaqatigiinniartussaapput.

Paasisat nutaat tunngavigalugit aalajangiisoqassaaq.

Siunissamili qanoq ilisoqariataarsinnaanera politikerit sammissanngilaat, imarmi agguaqatigiissillugu ukiumut 3 millimeterinik qaffattalereerpoq, ukiunilu tulliuttuni suli qaffannerusinnaanissaa ilimagineqarluni.

Københavnimi decembarimi ataatsimeersuarnissamut atugassamik nalunaarusiortoqartussaavoq, paasisat nutaat nalunaarummi ilaatinneqassallutik.